GM aksiyalarni xarid qilish dasturini 5 mlrd dollarga kengaytiradi

Amerikaning General Motors kompaniyasi aksiyalarni xarid qilish dasturini 5 mlrd dollarga kengaytirib, 14 mlrd dollarga yetkazishni rejalashtirmoqda. Bundan tashqari, xarajatlarni qisqartirish rejasiga 1 mlrd dollar qo‘shiladi, shu bilan dasturning umumiy hajmi 6,5 mlrd dollarga yetkaziladi. 

GM 2017 yilda sof pul oqimini 6 mlrd dollarga yetkazishni taxmin qilmoqda. Kompaniyaning bosh direktori Meri Barraning bayonot berishicha, General Motors 2017 yilda sof daromadining sezilarli o‘sishini kutmoqda. 2016 yilda GM foydasi bir aksiyaga 5,5−6  dollar ustama hisobidan bo‘lgan. 2017 yilda bu raqam har bir aksiya hisobiga 6−6,5 dollarga yetishi kutilayapti. 

Barraning so‘zlariga ko‘ra, «2016 yil kompaniya uchun barcha sohada ajoyib yil bo‘lgan. Kompaniyaning 2017 yilgi moliyaviy prognozi Shimoliy Amerika va Xitoydagi ko‘rsatkichlarning yuqori bo‘lishi, GM Financial (kompaniyaning moliyaviy sho‘'basi) daromadining o‘sishi, xarajatlarni kamaytirish samaradorligining davom etishi va Janubiy Amerikadagi vaziyat yaxshilanishiga doir taxminlar bilan bog‘liq».