DNK-ekspertiza Tu-154 aviahalokati qurbonlari orasidan doktor Liza jasadini aniqladi

Tu-154 aviahalokati qurbonlarining jasadlari qoldiqlari DNK-ekspertizadan o‘tkazilgach, «Adolatli yordam» fondi rahbari bo‘lgan Yelizaveta Glinka (doktor Liza) jasadi aniqlandi. TASS nashri xabar berishicha, uning jasadi 16 yanvar kuni Novodeviche qabristoniga dafn etiladi.

25 dekabr tongida Rossiya Mudofaa vazirligining Tu-154 samolyoti Suriyaga uchish vaqtida Qora dengizga quladi. Bortdagi ekipaj a'zolari, harbiylar, jurnalistlar, Aleksandrova orkestri musiqachilari, doktor Liza, jami 92 kishi halok bo‘lgan.

Yelizaveta Glinka o‘zining xayriya ishlari, yordam tashabbuslari bilan tanilgan edi (u Doktor Liza taxallusi ostida blog yuritgan, 2010 yili Rossiyada yil blogeri deb tan olingan). 2015 yildan boshlab gumanitar missiyalar safida bir necha bor Suriyada bo‘lgan hamda suriyaliklarga dori-darmon tarqatish va tibbiy yordam ko‘rsatish ishlarida qatnashgan.