BAA 2020 yilda Marsga "Umid" zondini uchirishni rejalashtirmoqda

2020 yilda Birlashgan Arab Amirliklarining "Umid" nomli zondi qo‘shni sayyora – Marsga uchiriladi. Bu haqda dasturning loyiha-menejyeri Omran Sharif Dubayda bo‘lib o‘tgan Project Space Forum anjumanida ma'lum qildi. 

Zondning "qizil sayyora"ga parvozi 7 oy muddat davom etishi kerak. Rejaga ko‘ra, qurilma Mars orbitasiga 2021 yilda yetib boradi. 

BAA federal fazoviy agentligi 2014 yilda tashkil etilgan edi. O‘shanda mamlakat hukumati, arab davlatlari orasida birinchi bo‘lib Marsga kosmik zondni yuborish rejasini bildirgandi. 

Dastur maqsadi Mars iqlimi va atmosferasi haqidagi bilimni kengaytirishdan iborat. To‘plangan va Yerga yuboriladigan ma'lumotlar hajmi 1 terabaytni tashkil etadi. Loyihada 70 nafar mahalliy olim va muhandislar faoliyat yuritadi. 2020 yilga kelib ularning soni 150 nafarga yetadi.