Eron milliy neft kompaniyasi rahbari Ali Kardor 2017 yil 20 martgacha Eron kunlik neft qazib olish hajmini 4 mln barrelgacha oshirmoqchi ekanligini ma'lum qildi. U bu haqda SHANA axborot agentligiga aytib o‘tdi. Bu orada OPeK bilan kelishuvga ko‘ra, Tehronga kunlik neft qazib olish hajmi 3,79 mln barreldan oshmasligi belgilab qo‘yilgan.
Kardorning aytishicha, yil oxiriga kelib Eron neft eksporti kuniga 3 mln barrelga yetadi. Amaldorning ta'kidlashicha, Eron 2016 yil dekabrda Yevropaga neft mahsulotlari eksporti rekord darajasiga – kuniga 0,9 mln barrelga erishdi.
2016 yil noyabr oxirida OPeK a'zolari Venada umumiy neft qazib olish hajmini kuniga 32,5 mln barrelgacha qisqartirishga kelishib olgandilar.
Bunda Eron uchun istisno qilingan, chunki ushbu mamlakat yaqindagina xalqaro sanksiyalar ostidan chiqqan. OPeK Eronga kunlik neft qazib olish hajmini 90 ming barrelga, ya'ni kuniga 3,797 mln barrelgacha oshirishga ruxsat bergan. Shuningdek, Nigeriya va Liviyaga ham neft qazib olish hajmini kamaytirmaslikka ruxsat berilgan.
