OAV: Google Uber kompaniyasini o‘g‘irlikda ayblab sudga berdi

Amerikaning Google kompaniyasi egasi bo‘lgan Alphabet Inc. Uber taksi xizmatiga nisbatan sudga murojaat qildi. U mazkur kompaniyani lidar (lazerli lokator) texnologiyasini o‘g‘irlashda ayblamoqda. Mazkur texnologiya haydovchisiz boshqariladigan avtomobillarda qo‘llaniladi, deb xabar qilmoqda Business Insider nashri.

Xabar qilinishicha, Alphabet Inc. muqobil avtomobillar uchun texnologiyalarni ishlab chiqarishga ixtisoslashgan Waymo kompaniyasini tashkil etgan. Ayni kompaniya Uber va Google kompaniyasining sobiq muhandislarini lidarni o‘g‘irlashda ayblamoqda. 

«Fikrimizcha, ushbu harakatlar Waymo tijoriy rejalari va intellektual mulkini egallab olish uchun aniq reja asosida amalga oshirilgan», — degan Google egalari.

Taxminlarga ko‘ra, Google sobiq xodimi Entoni Levandovski kompaniyani tark etishidan avval, Waymo kompaniyasiga tegishli 14 mingdan ortiq turli chizmalardan yashirincha nusxa olgan. Ular orasida lidar ham bo‘lgan, Entoni Uber tarkibidagi startapida ushbu chizmalardan foydalangan.