Ashxobod va Toshkent elektr energiyasi bo‘yicha hamkorlikni faollashtiradi

Turkmaniston va O‘zbekiston global kun tartibining muhim yo‘nalishlaridan biri bo‘lgan barqaror rivojlanish va uning tarkibiy qismlari – energoxavfsizlik, xalqaro transport-tranzit qatnovining rivojlanishi, ekologiya va atrof-muhitni himoya qilish bo‘yicha harakatlarni muvofiqlashtirishda davom etadi. Turkmaniston Prezidenti Gurbanguli Berdimuxamedov va O‘zbekiston Prezidenti Shavkat Mirziyoyev Ashxobodda o‘tkazilgan muzokaralar yakuni bo‘yicha ommaviy axborot vositalari vakillari oldida chiqish qilib, shunday bayonot berishdi.

Gap barqaror energetika sohasida Turkmaniston va O‘zbekistonning mintaqadagi keng ko‘lamli energetika loyihalarini amalga oshirishda ishtirok etishi haqida bormoqda. Ular orasida, avvalo, Turkmaniston-O‘zbekiston-Qozog‘iston-Xitoy gaz quvurini tilga olish mumkin. Bundan tashqari, biz Turkmaniston-O‘zbekiston-Tojikiston-Afg‘oniston-Pokiston yo‘nalishi bo‘yicha Markaziy Osiyodan Janubiy Osiyoga elektroenergiya yetkazib berish bo‘yicha hamkorligimizni faollashtirishga tayyormiz, deya xabar qildi Turkmaniston rahbari.

Davlat rahbarlari ushbu uchrashuv Turkmaniston-O‘zbekiston hamkorligiga sifatli turtki beradi, deya ta'kidlashdi. Davlatlararo muloqot holati muhokama qilindi, qator xalqaro masalalar bo‘yicha fikrlar almashildi. Siyosiy, savdo-iqtisodiy va madaniy-gumanitar sohalarda Turkmaniston-O‘zbekiston hamkorligini belgilovchi ikki tomonlama hujjatlar paketi imzolandi.