Acibadem klinikasining yuqori malakali urolog-shifokori, tibbiyot fanlari professori Selchuk Yujyel “Kun.uz” muxbiriga urologik kasalliklarni davolashdagi zamonaviy yondashuvlar haqida so‘zlab berdi.
— Professor, urologga ko‘pincha qaysi kasalliklar bilan murojaat qilishadi?
— Prostata adenomasi - har oltinchi erkakda uchraydigan, eng keng tarqalgan kasallik. “Xavf guruhi”da – 50 yoshdan oshgan kishilar. Prostata adenomasi rivojlanishining sababi – yosh o‘tgan sayin erkaklar organizmida kuzatiluvchi gormonal buzilishlar. Undan keyingi o‘rinlarda buyraklar saratoni, o‘t qopi saratoni, peshobni tutib tura olmaslik, erektil disfunksiya (jinsiy quvvatsizlik) kasalliklarini qayd etish mumkin. Bolalarni esa ko‘pincha buyraklar kasalligi va peshob yo‘lidagi infeksiyalar bezovta qiladi.
— Urologiyadagi muammolarni chetlab o‘tish uchun nimalarni tavsiya qilasiz?
— Reproduktiv salomatlik borasida, xuddi boshqa sohalar kabi, bolalikdan qayg‘urish kerak. Kasallikni ilk rivojlanish bosqichida aniqlash yoki uni davolash uchun bolalarning, ayniqsa o‘g‘il bolalarning ota-onalari juda e'tiborlari bo‘lishlari lozim. Agar bola hojatga chiqishga qiynalsa yoki aksincha, tez-tez u yerga chiqsa, bu shifokorga murojaat qilish uchun yetarli asos bo‘la oladi. Agar siz peshob chiqarish yo‘li o‘z joyida emasligini sezgan bo‘lsangiz, mutaxassisga murojaat qilishingiz zarur. Bolani cho‘miltirayotgan paytingizda uning moyaklari to‘liq tushgan yo tushmaganligiga e'tibor bering. Agar moyaklardan biri to‘liq tushmagan bo‘lsa, bu kelgusida bepushtlikka olib kelishi mumkin. Agar moyaklar organizm ichida qolib ketsa, bu saraton rivojlanishiga olib keladi. Agar bolaning buyraklari yoki o‘t qopida tosh bo‘lsa, u qorin og‘rig‘idan shikoyat qiladi. Bolalarda tosh hosil bo‘lgandagi og‘riq kattalarnikidan farq qiladi. Bolaning issig‘i chiqib, titroq bosishi mumkin. Shunday belgilar sezilgan taqdirda, shifokorga murojaat qiling. Bundan tashqari, kasallik irsiy bo‘lsa, uning rivojlanish ehtimoli yuqoriroq bo‘ladi.
Inson necha yoshda bo‘lishidan qat'i nazar, har yili bir marta UTTdan o‘tish kerak, bu o‘simtani erta bosqichda aniqlash imkonini beradi.
Tuz iste'molini kamaytirish, gazli ichimliklar, limonadlarni ichmaslik hamda apelsin rangidagi mevalarni yemaslikni tavsiya qilaman. Bu siydik yo‘li tizimiga salbiy ta'sir ko‘rsatadi.
