Bolgariya Turkiyadan elchisini chaqirtirib oldi

Bolgariya Turkiyani mamlakatdagi muddatdan avvalgi parlament saylovlari jarayoniga aralashishda aybladi va o‘zining Turkiyadagi elchisini maslahatlashish uchun chaqirtirib oldi. Bu haqda 16 mart kuni The Sofia Globe nashri xabar berdi. 

Jumladan, Bolgariya Anqara mahalliy turklar manfaatini bildirishga da'vogarlik qiluvchi mahalliy partiyalardan birini qo‘llab-quvvatlashini aytdi. Shu bilan bog‘liq holda Turkiya mehnat va ijtimoiy ta'minot vaziri Mexmet Muyazzino‘g‘luning Turkiyada yashovchi bulg‘orlarni "Ma'suliyat, ozodlik va bag‘rikenglik uchun demokratlar" partiyasiga ovoz berishga chaqirgani eslatib o‘tildi.

Bolgariya bosh vazirining ichki tartib va xavfsizlik bo‘yicha o‘rinbosari, mudofaa vaziri Stefan Yanev saylovlar arafasida "migratsion oqimning faollashishidan", ya'ni Turkiyada yashovchi Bolgariya fuqarolari o‘z vatanlariga kelib, ovoz berishlari mumkinligidan ogohlantirdi. Yanev shuningdek mamlakat rahbariyati Bolgariya-Turkiya chegarasini shunday ovoz beruvchilar kesib o‘tishining oldini olmoqchiligini aytdi.   

7 mart kuni Bolgariya tashqi ishlar vazirligi Turkiya elchisini chaqirtirib, unga "mamlakatning ichki ishlariga aralashilishidan" norozilik bildirgandi. Bunga javoban Anqara Sofiyani Turkiyada yashovchi bulg‘orlarning yashash manzili bo‘yicha ovoz berish imkoniyatini cheklash bilan saylov huquqlarini tahqirlashda ayblagan.

Bolgariyada muddatdan avval parlament saylovlari 26 mart kuni bo‘lib o‘tadi. Bolgariyada musulmonlar aholining 13 foizini tashkil qiladi. Ularning katta qismini turklar tashkil qiladi. Ayni vaqtda Turkiyada 60 mingga yaqin bulg‘orlar yashaydi. Ular oxirgi o‘n yil ichida Turkiyaga ko‘chib o‘tishgan va shu bilan birga Bolgariya fuqaroligini saqlab qolishgan.