Nikoh qurmasdan farzand asrab olgan yolg‘iz ota yoki ona ham “Kamolot uyi” olish huquqiga ega yosh oila hisoblanadi

O‘tgan yili O‘zbekiston Respublikasining “Yoshlarga oid davlat siyosati to‘g‘risida”gi Qonuni (O‘RQ-406-son) qabul qilinib, yoshlarga oid davlat siyosati, yoshlar (yosh fuqarolar), yosh oila, yosh mutaxassis va yoshlar tadbirkorligi kabi tushunchalarga huquqiy tushuntirishlar berilgandi.

Qonunning 3-moddasiga ko‘ra, yosh oila – er-xotinning ikkisi ham o‘ttiz yoshdan oshmagan oila yoxud farzand (bola) tarbiyalab voyaga yetkazayotgan o‘ttiz yoshdan oshmagan yolg‘iz otadan yoki yolg‘iz onadan iborat bo‘lgan oila, shu jumladan nikohdan ajralgan, beva erkak (beva ayol) – deb, belgilandi.

O‘zbekiston Respublikasi Vazirlar Mahkamasining 2014 yil 8 sentabrdagi 250-sonli “Mamlakatning ijtimoiy hayotida faol qatnashayotgan yosh oilalarni uy-joy bilan ta'minlashni yanada qo‘llab-quvvatlash chora-tadbirlari to‘g‘risida”gi qaroriga asosan “Kamolot”ning ko‘p kvartirali uylari yosh oilalarga imtiyozli ipoteka kreditlari asosida ajratiladi.

O‘zbekiston “Kamolot” YoIH Markaziy Kengashi tomonidan O‘zbekiston Respublikasining “Normativ-huquqiy hujjatlar to‘g‘risida”gi Qonunining 43-moddasidan kelib chiqib, bugungi kunda O‘zbekiston Respublikasi Prezidentining virtual qabulxonasi, shuningdek “Kamolot”ning ko‘p kvartirali uylarining www.kamolotuyi.uz rasmiy veb-saytining virtual qabulxonasiga hamda boshqa tashkilotlardan kelayotgan ko‘plab jismoniy va yuridik shaxslarning murojaatlarini hisobga olib, “...farzand (bola) tarbiyalab voyaga yetkazayotgan o‘ttiz yoshdan oshmagan yolg‘iz otadan yoki yolg‘iz onadan iborat bo‘lgan oila...” – tushunchasiga (ota yoki onaga nikoh tuzilganligi yoki tuzilmaganligining shartligi) rasmiy sharh berilishini so‘rab, O‘zbekiston Respublikasi Konstitutsiyaviy sudiga murojaat qilindi.

O‘zbekiston Respublikasi Konstitutsiyaviy sudi tomonidan joriy yilning 24 fevralidagi 02-09/139-sonli berilgan javob xatida, mazkur qonunchilikka kiritilgan yangi qoida yolg‘iz ota yoki yolg‘iz ona tushunchasiga ularning ilgari nikohdan o‘tganligi yoki o‘tmaganligi yoxud nikohdan ajrashmaganligi shart emasligi keltirib o‘tilgan.

Bundan kelib chiqadiki, qonunchilikka muvofiq, qonuniy nikohdan o‘tmagan farzand (bola) tarbiyalab voyaga yetkazayotgan o‘ttiz yoshdan oshmagan yolg‘iz ota yoki yolg‘iz ona ham “yosh oila” hisoblanadi hamda yuqorida keltirilgan 250-sonli Qarorga muvofiq “Kamolot uyi”ni olishga da'vogarlik qilishi mumkin.