Sindzo Abe Moskvaga keladi

27 aprel kuni Yaponiya bosh vaziri ikki kunlik tashrif bilan Rossiyaga kelmoqda. Muzokaralarning asosiy mavzusi Kuril orollarini birgalikda iqtisodiy o‘zlashtirish bo‘ladi. Tashrif dasturiga muvofiq, Abe Moskva va Sankt-Peterburg shaharlariga tashrif buyurishi kutilmoqda. 

Moskva shahrida Rossiya prezidenti Vladimir Putin va Yaponiya bosh vaziri Sindzo Abe muzokaralar o‘tkazadi. Ikki davlat yetakchilari Kurilni o‘zlashtirish mavzusini davom ettiradi. Moskva buni tinchlik shartnomasini imzolash yo‘lidagi qadam deb hisoblaydi. Kun tartibida, shuningdek, yana bir muhim mavzu KXDR yadro muammosi ham bo‘lishi mumkin. Tokio Koreya yarim orolidagi xavfsizlik muammolarini hal etishda Moskvaning faol ishtirok etishini kutmoqda. 

Tomonlar Rossiya rahbarining 2016 yil 15-16 dekabrdagi Yaponiyaga tashrifi chog‘ida erishilgan kelishuvlarning hayotga tatbiq etilishi masalasini muhokama qilishadi, deyiladi Kreml ma'muriyati saytida. Sindzo Abe yana bir marta Kuril orollari bilan bog‘liq ko‘p yillik tortishuvda olg‘a siljishga erishishni qasd qilgan. 

Oliy darajadagi muzokaralar chog‘ida Kurilning janubiy orollarini birgalikda iqtisodiy rivojlantirish masalalari atroflicha o‘rganiladi. Yaponiya Kuril orollarining Xamobai, Iturup, Kunashir va Shikotan orollarini o‘ziga tegishli deb hisoblaydi. 

Ushbu orollarni Ikkinchi jahon urushi yakunlariga ko‘ra qo‘lga kiritgan Rossiya esa, bu orollarning qaytarilishiga doir masala umuman muhokama qilinmasligini ta'kidlab keladi. 

Yaponiya ushbu orollarni iqtisodiy o‘zlashtirish borasida 30dan ortiq sohada hamkorlik qilishni taklif etayotgan bo‘lsa, o‘z navbatida, Rossiya baliqchilik, turarjoylarni qurish va ta'mirlashda hamkorlikni ilgari surmoqda. Bundan tashqari, tomonlar Kuril orollarining geoenergetika salohiyati va baliq konservalash yo‘nalishlarida hamkorlik istiqbollarini ko‘rib chiqishadi. 

Sindzo Abe Rossiyadan so‘ng Londonga yo‘l oladi. Bu haqda Yaponiya hukumati bosh kotibi Yosixide Suga ma'lum qildi. Bu Abening Tereza Mey Buyuk Britaniya bosh vaziri lavozimiga kelganidan keyingi ilk tashrifi bo‘ladi.