AQSh huquq himoyachilari Tramp ma'muriyatini sudga berishdi

AQShdagi huquqni himoya qilish tashkiloti Protect democracy project (PDP) sud orqali AQSh prezidenti Donald Tramp ma'muriyatidan 7 aprelda Suriya hududini qanotli raketalar bilan o‘qqa tutganini tushuntirib berishni talab qilmoqda. The New York Times nashrining ma'lum qilishicha, Tramp ma'muriyati ustidan da'vo arizasi Vashingtondagi Kolumbiya okrugi federal sudiga topshirilgan.

PDP Oq uy zarbadan bir oy o‘tgach hali ham zarba berishga nima asos bo‘lganiga huquqiy tushuntirish bermaganidan shikoyat qilmoqda. Avvalgi prezident Barak Obama ma'muriyati huquqshunoslari guruhidan bo‘lgan huquq himoyachilari bu masala bo‘yicha javobgarlar sifatida AQSh adliya, mudofaa vazirliklarini va Davlat departamentini ko‘rmoqchi. Ushbu idoralarda da'voga javob berish uchun 20 kun vaqt bor.

4 aprelda Suriya muxolifati Suriya armiyasi tomondan Xon-Shayxunda kimyoviy qurol qo‘llanganini ma'lum qilgan. Ta'kidlanishicha, ushbu hujum oqibatida 87 kishi halok bo‘lgan va 200 dan ko‘proq kishi yaralangan. Damashq bu voqeaga aloqasi yo‘qligini ta'kidlashiga qaramasdan, Donald Tramp 7 aprelga o‘tar kechasi Suriyadagi Shayrat aerodromiga zarba berishga buyruq bergan. Aerodromga 58 ta qanotli raketa bilan zarba berilgan.   

Taxminlardan biriga ko‘ra, Trampga zarba berish qarorini qabul qilishda qizi Ivanka ta'sir ko‘rsatgan. The Independent nashrining ta'qidlashicha, Ivanka Xon-Shayxunda qurbon bo‘lganlar va jarohatlanganlar tasvirlangan lavhalardan ta'sirlanib otasiga zarba berish lozimligini uqtirgan. Keyinroq u bu taxminlarni rad etgan.