Samarqandda xalqaro ilmiy-madaniy kongress bo‘lib o‘tmoqda

O‘zbekiston Elektron ommaviy axborot vositalari milliy assotsiatsiyasi, YuNeSKOning Toshkentdagi vakolatxonasi, Konrad Adenauer nomidagi fondning Markaziy Osiyodagi vakolatxonasi va qator tashkilotlar hamkorligida Toshkent va Samarqand shaharlarida «O‘zbekiston madaniy merosi – xalqlar va mamlakatlar o‘rtasidagi muloqotga yo‘l» mavzuidagi xalqaro ilmiy-madaniy kongress bo‘lib o‘tmoqda.

Ko‘hna va hamisha navqiron shaharda davom etayotgan ilmiy-madaniy kongressning ikkinchi kunida Registon maydonining Mirzo Ulug‘bek madrasasida ishtirokchilari uchun o‘zbek gilamchiligi va kashtachiligining eng sara gilam namunalari hamda so‘zanalari ko‘rgazmasi tashkil etildi. Ko‘rgazmada Samarqand shahridagi «O‘zbekiston madaniyati tarixi» davlat muzeyining fondida saqlanayotgan gilam va so‘zanalari namoyish etildi.

Xalqaro ilmiy anjuman davomida «O‘zbekiston gilamlari va so‘zanalari dunyo to‘plamlarida» albomining taqdimoti ham bo‘lib o‘tdi.

O‘zbekiston milliy madaniy marosini dunyo xalqlariga namoyish etish maqsadida tashkil etilgan ushbu kongressda sharqshunoslik, arxeologiya, tarix, sharq qo‘lyozmalari, numizmatika, to‘qimachilik, kulolchilik sohalariga ixtisoslashgan 120 dan ortiq xorijiy va 100 dan ortiq mahalliy olim va ekspert ishtirok etishdi. Xususan, Rossiya, Kanada, Italiya, Buyuk Britaniya, Hindiston, Misr, Koreya, Belgiya, Niderlandiya, Fransiya, Germaniya, Chexiya, AQSh, Xitoy, Turkiya, Gretsiya, Ozarboyjon va boshqa mamlakatlardan dunyo ilm-fani vakillari — mashhur olimlar, muzeylar va ilmiy institutlar rahbarlari, ilmiy jurnallar muharrirlari, taniqli kolleksionerlar bilan birga YuNeSKO va ICOMOS (Yodgorliklar va osori atiqalarni saqlash bo‘yicha xalqaro kengash) vakillari, ko‘p sonli asarlar va kitoblar muallifi bo‘lgan olimlar tashrif buyurishgan.

Samarqandda o‘tkazilayotgan tadbir doirasida «Dunyo to‘plamlarida O‘zbekistonning madaniy merosi» eksklyuziv madaniy-ma'rifiy media-loyihasining taqdimoti ham bo‘lib o‘tdi.

Xalqaro ilmiy-madaniy kongress davomida «O‘zbekistonning madaniy merosi» turkumida uch tilda nashr etilgan kitob albomlarning dastlabki besh jildi — «Sharq davlat muzeyi to‘plami» (Moskva sh.), «Rossiya etnografiya muzeyi to‘plami» (Sankt-Peterburg sh.), «Tretyakov davlat galereyasi to‘plami» (Moskva sh.), «O‘zbekiston gilamlari va kashtalari dunyo to‘plamlarida» (Rossiya, AQSh, Kanada, Avstraliya), «Alisher Navoiy asarlari Rossiya milliy kutubxonasi to‘plamlarida» (Sankt-Peterburg sh.) kitoblari namoyish etildi.

Xalqaro ilmiy-madaniy kongressda nashr etishga tayyorlanayotgan 6 ta jild — «O‘zbekistonning musiqiy merosi», «Davlat Ermitaji to‘plami», «Davlat tarix muzeyi to‘plami», «Sharq qo‘lyozmalari instituti to‘plami», «O‘zbekiston gilamdo‘zligi: asrlar osha saqlangan an'analar» va «Germaniya muzeylari to‘plamlari» taqdimoti ham o‘tkazildi.

Xalqaro kongress davomida ishtirokchilar Samarqanddagi Konigil qishlog‘idagi «Meros» qog‘oz ishlab chiqarish fabrikasi faoliyati bilan ham yaqindan tanishishdi.