Ispaniyada «Barselona»ning sobiq prezidenti hibsga olindi 

Ispaniya huquq-tartibot organlari «Barselona»ning sobiq prezidenti Sandro Roselni hibsga oldi. Bu haqda El Mundo xabar tarqatdi.

Reyter xabariga ko‘ra, Kataloniyada milliy gvardiya va politsiya ishtirokida o‘nlab uylar va ofislarda o‘tkazilgan reyd vaqtida Roseldan tashqari yana bir necha kishi qo‘lga olingan.

Rosel Braziliya terma jamoasining imij huquqlaridan komission pul ishlagan jinoiy tarmoqqa a'zolik va shu tarmoqda «pul yuvish»da gumon qilinmoqda. Rosel va uning sheriklari soliq borasida «jannat» hisoblangan mamlakatlardagi ofshor kompaniyalari orqali 35 million yevro «pul yuvgan» bo‘lishi mumkin.

Xabar qilinishicha, Rosel «Barselona»ni boshqarishdan avval Braziliya futbol konfederatsiyasi (CBF) bilan hamkorlik qilgan. Rosel bu ishi uchun o‘zining Ailanto Marketing kompaniyasidan foydalangan va Braziliya terma jamoasining o‘rtoqlik uchrashuvlaridan foyda ko‘rgan. Keyin esa u pullarini turli fondlarda yashirgan.

«Pul yuvish» ishida CBF’ning sobiq prezidenti Rikardo Teysheyra ham ishtirok etgani gumon qilinmoqda.

Avvlroq, Rosel bilan FBR shug‘ullanayotgani va unga nisbatan surishtiruv ishlarini boshlagani xabar qilingan edi.

Rosel 2010 yildan 2014 yilgacha «Barselona» prezidenti sifatida ishlagandi. U 2013 yili Neymarning «Santos»dan «Barselona»ga o‘tishidagi moliyaviy firibgarlikka ham aralashgan. 2016 yilning noyabrida Ispaniya sudi Neymarning transferi bo‘yicha ishni yopgandi. May oyida Neymarga qarshi ish yana ochildi, unga Neymar, oila a'zolari, «Barselona»ning hozirgi prezidenti Xosep Bartomeu bilan birgalikda Sandro Rosel ham jalb etilgan. Prokuratura Rosel uchun 5 yillik qamoq jazosi so‘ragan.