Moskvada dovul oqibatida qurbon bo‘lganlar soni ortdi

Foto: TASS

Moskvada avj olgan dovul qurbonlari soni 16 kishini tashkil qilmoqda. Bu haqda Podmoskove gubernatori Andrey Vorobevga asoslangan holda RIA Novosti xabar bermoqda.

Shuningdek, 100dan ortiq kishi jabrlangan, ular orasida bolalar ham bor.

Oxirgi ma'lumotlarda qurbonlar soni 11 kishi ekani aytilgandi.

29 may kuni Moskvaning turli hududlarida kuchli yomg‘ir quydi, kuchli shamol oqibatida yuzlab daraxtlar quladi. Shamol tezligi sekundiga 30 metrgacha yetdi.

Qutqaruvchilar, kommunal va yo‘l xizmatlari, energetiklar dovul oqibatlarini bartaraf etishga kirishib ketishgan. Rossiya favqulodda vaziyatlar vazirligida ma'lum qilinishicha, Rossiyaning markaziy qismi va Moskvada aholisi 4000 kishidan ko‘proq bo‘lgan 20 dan ko‘proq aholi punkti elektr energiyasiz qolib ketgan, 1000 dan ko‘proq daraxt qo‘porib yuborilgan, 30 dan ortiq ko‘p qavatli va xususiy uylarning tomlariga, o‘nlab mashinalarga shikast yetgan.