Nyu-York teatri spektakl bosh qahramoni Trampga o‘xshash bo‘lgani uchun homiylardan ayrildi

Delta Airlines aviakompaniyasi va Amerika Banki Public Theater notijoriy tashkilotini moliyalashtirish to‘xtatilganini ma'lum qilishdi. Bunga sabab – “Yuliy Tsezar” spektakli bosh qahramonining AQSh prezidenti Donald Trampga o‘xshab ketishida. Bu haqda Reuters agentligi xabar berdi.

23 may kuni Nyu-Yorkda premerasi bo‘lib o‘tgan Public Theater’ning spektakli Uilyam Shekspirning “Yuliy Tsezar” fojiasi zamonaviy talqini hisoblanadi. Unda bosh qahramon sariq sochli bo‘lib, ishbilarmonlar kostyumini kiyib yuradi hamda Amerika bayrog‘i tasvirlangan maxsus nishonni taqib oladi. Tsezarning rafiqasi – Kalpurniya esa slavyancha talaffuz bilan gapiradi va dizaynerlar yaratgan libosni kiyishni xush ko‘radi (Donald Trampning rafiqasi, Melanya Tramp asli Sloveniyadan).

Aviakompaniya vakillari fikricha, “teatr rahbariyatining badiiy to‘qimalari chegaradan chiqib ketgan”. Amerika Banki vakili esa spektaklni moliyalashtirish to‘xtatilgani haqida qisqa bayonot bilan chiqdi.