Mbappe hozircha «Real»ga kerak emas, lekin u sotib olinadi

«Real» rahbariyati «Monako»ning 18 yoshli hujumchisi Kilian Mbappeni qo‘lga kiritish fikridan qaytmagan.

AS nashri tarqatgan xabarga ko‘ra, futbolchi «Monako» tarkibida qolib, JCh-2018 musobaqasiga borish uchun o‘yin amaliyotiga ega bo‘lishni maqsad qilgan. Monegasklar jamoasi ham yangi mavsumda undan voz kechishni istamayapti.

Bunday vaziyatda «Liverpul», «Arsenal», «Manchester Yunayted» va «PSJ» jamoalari ham talabgor bo‘lib turgan futbolchiga ega bo‘lish uchun «Real» o‘ziga xos ayyorlikka qo‘l uradi.

Qirollik klubi yosh hujumchi bilan shartnoma imzolab, keyin uni «Monako»ga bir yil muddatga ijaraga bermoqchi. 

«Monako»ga ushbu futbolchi transferi uchun «Real» 135 mln yevro to‘laydi.

Futbolchining o‘zi bundan oldinroq Chempionlar ligasida g‘oliblik uchun kurashadigan jamoa safiga o‘tishni orzu qilishi, faqat o‘ziga asosiy tarkibdan joy kafolatlovchi jamoada o‘ynamoqchi ekanini ma'lum qilgandi.