Mo‘g‘ulistondagi prezidentlik saylovlarida g‘olib aniqlanmadi

26 iyunda Mo‘g‘ulistonda o‘tgan prezidentlik saylovlarida g‘olib aniqlanmadi, chunki nomzodlardan birortasi zarur bo‘lgan ko‘pchilik ovoz to‘play olmadi, deb xabar bermoqda Reuters axborot agentligi. 

Shu tufayli saylovlarning 2-bosqichi bo‘lib o‘tadi, unda 1-bosqichda eng ko‘p ovoz to‘plagan ikki nomzod ishtirok etadi. 1-bosqichda eng ko‘p ovozga mamlakatning sobiq transport vaziri, Demokratik partiya nomzodi Xaltmaagiyn Battulga ega bo‘ldi.

Biroq mamlakat markaziy saylov komissiyasi Battulganing 2-bosqichdagi raqibi kim bo‘lishini hali aytmadi, chunki byulletenlar hisob-kitob qilinishda davom etmoqda. U Mo‘g‘uliston xalq partiyasi nomzodi Miyeegombin Enxbold yoki Mo‘g‘uliston Xalq-inqilob partiyasi vakili Saynxuugiyn Ganbaatar bo‘lishi mumkin.