Qatar arab davlatlari talablarini bajarishni rad etdi

Qatar hukumati arab davlatlari tomonidan amirlik bilan munosabatlarni tiklash uchun Dohaga qo‘yilgan talablar ro‘yxatini qabul qilishni rad etdi, biroq muloqot qilishga tayyor. Bu haqda Qatar tashqi ishlar vaziri Muhammad bin Abdulrahmon Ol Soniy ma'lum qildi, deb xabar bermoqda Al Jazeera telekanali. 

"Biz talablar ro‘yxatini rad etamiz va tegishli shartlar bilan muloqot qilishga tayyormiz. Qatar boshidan uning suverenitetiga putur yetkazuvchi biror ishga chidab turmasligini aytgan. Biz qo‘rqmaymiz va ultimatum muddati tugagandan keyin istalgan salbiy oqibatlarga qarshi turishga tayyormiz", deb aytgan Ol Soniy.

Qatar vaziri Doha amirlikni blokada qilishda ishtirok etayotgan "arab davlatlaridan farqli, konstruktiv pozitsiyani" egallayotganini aytdi. Diplomatning fikricha, Saudiya Arabistoni, BAA va Bahrayn "Qatarga qarshi choralarni inqirozni hal qilishning kelishilgan mexanizmini ko‘zda tutmay qabul qilishgan".  

Uning aytishicha, arab davlatlarining inqirozdan chiqish uchun Qatarga qo‘ygan talablari amirlik ustidan nazorat o‘rnatishga qaratilgan va xalqaro huquqqa ziddir. 

"Blokadada ishtirok etuvchi davlatlar tomondan ko‘rilgan choralar xalqaro huquqqa zid keladigan jamoaviy jazo berish hisoblanadi", deb aytgan Ol Soniy va "bu talablar rad etiladigan qilib tuzilganini" ta'kidlab o‘tdi. "Talablardan maqsad – Qatar ustidan nazorat o‘rnatishdir", deb hisoblamoqda vazir. 

Uning ta'kidlashicha, Fors ko‘rfazi arab davlatlari hamkorlik kengashi va Arab davlatlari ligasi inqirozni hal qilishda hech qanday rol o‘ynamayaptilar. U borada Moskvaning konstruktiv fikr bildirayotganini va "Rossiya Fors ko‘rfazi davlatlarini muloqot qilishga va vaziyatning avj olishini qo‘llab-quvvatlamaslikka chorlayotganini" qayd qilib o‘tdi.   

Ol Soniy talablarga izoh berib, Dohadagi Al Jazeera telekanali yopilishi, Eron bilan munosabatlar darajasini pasaytirish va Turkiya bilan harbiy hamkorlikdan bosh tortish masalasi ko‘rilmasligini aytgan.