«O‘zbekneftgaz» 12 ming xodimni ishdan bo‘shatadi

«O‘zbekneftgaz» Milliy holding kompaniyasi tizimida 12 ming xodim qisqartiriladi. Bu haqda O‘zbekiston Respublikasi prezidenti Shavkat Mirziyoyevning 30 iyun kungi neft va gaz sanoatining boshqaruv tizimini takomillashtirish to‘g‘risidagi 3107-sonli qarorida nazarda tutilgan. Qaror matni prezident matbuot xizmati tomonidan e'lon qilingan.

Davlat rahbari Bandlik va mehnat munosabatlari vazirligiga ishdan bo‘shatiladigan xodimlar yangi ishga joylashishida ko‘maklashish vazifasini topshirgan.

Qarorga ko‘ra, «O‘zbekneftegaz» MXK, «O‘zneftgazqazibchiqarish» AK, «O‘ztransgaz» AK, «O‘zneftmahsulot» AK va «O‘zneftgazmash» AKning tashkiliy-huquqiy shakli o‘zgartirildi. Endilikda bu tuzilmalar aksiyadorlik jamiyatlariga aylantiriladi. Qator tashkilotlar qayta tashkil etiladi yoki «O‘zbekneftgaz» va uning aksiyadorlik jamiyati tarkibidan alohida tashkilot sifatida chiqariladi.

«O‘zbekneftgaz» tarkibida «O‘zbekneftgaz» va uning aksiyadorlik jamiyatlari tarkibiga kiruvchi tashkilotlar tomonidan mahsulotlarini eksport qilishga ixtisoslashgan «Neftgazeksport» MChJ tuziladi.

«O‘ztransgaz» mintaqalararo unitar korxonalarining 6ta bazasi qoshida 14ta gaz ta'minotining hududiy filiallari, «O‘zneftmahsulot»ning 23ta unitar korxonalari bazasi qoshida esa neft mahsulotlarining realizatsiyasini amalga oshiruvchi MChJ shaklidagi 15ta mintaqaviy tashkilot tashkil etiladi. Shu bilan birga tuman va shahar gaz ta'minoti filiallarining tumanlararo gaz ta'minoti uchastkalari, shuningdek, neft mahsulotlarini saqlash va realizatsiya qiladigan past rentabelli obektlar soni optimallashtiriladi.

«O‘zbekneftgaz»ga neft va gaz sanoati strukturasini chuqur o‘zgartirish, mahsulotlarning raqobatbardoshliligini oshirish, shuningdek, aholining neft va gaz mahsulotlariga bo‘lgan iqtisodiy ehtiyojini qondirishdan kabi vazifalar qo‘yilgan.

«O‘ztransgaz» AJga transport magistral gaz quvurlari va gaz taqsimlash tarmoqlarini takomillashtirish, sotilgan gaz hisobini yuritish, daromadning to‘liq tushishini yo‘lga qo‘yish, gazning yo‘qotilishi, asossiz va noratsional sarflanishiga barham berish, gaz tarmoqlariga noqonuniy ulanish va gaz o‘g‘irlash holatlariga barham berish bo‘yicha choralarni qo‘llash yo‘li bilan mamlakat iste'molchilarini tabiiy va suyultirilgan gaz bilan ta'minlash yuzasidan vazifalar yuklatilgan.