Pokistondagi portlash qurbonlari soni ortmoqda

Pokistonning Panjob viloyatidagi Lahor shahrida yuz bergan portlash oqibatida kamida 26 kishi halok bo‘lgan, yana 58 kishi jarohatlangan. Bu haqda hukumatdagi manba xabar berdi.

Bundan avvalgi xabarlarda qurbonlar soni 22 kishi ekani, 37 kishi jarohatlangani ma'lum qilingandi.

Portlash Arfa Karim nomidagi texnopark yonidagi Feruzpur Roud ko‘chasida joylashgan sabzavot bozoriga kiraverishda yuz bergan.

Jarohatlanganlarning ko‘pchiligi og‘ir ahvolda qolmoqda, qurbonlar soni ortishi mumkin.

Politsiya vakillarining telekanalga ma'lum qilishicha, portlashni xudkush terrorchi uyushtirgan. Uning maqsadi huquqni muhofaza qilish idoralari xodimlarini yo‘q qilish bo‘lgan. Dastlabki ma'lumotlarga ko‘ra, kamida 8 politsiyachi halok bo‘lgan.