Vazirlar Mahkamasining 24.07.2017 yildagi 537-son qarori bilan 2017 — 2021 yillarda O‘zbekiston Respublikasida yuqumli kasalliklarga, shu jumladan virusli gepatitlarga tashxis qo‘yish, ular profilaktikasi va ularni davolash usullarini yanada takomillashtirish bo‘yicha kompleks chora-tadbirlar tasdiqlandi. Bu haqda Norma.uz xabar bermoqda.
U o‘z ichiga to‘rtta asosiy yo‘nalish bo‘yicha chora-tadbirlarni oladi:
• yuqumli kasalliklarga tashxis qo‘yish, ular profilaktikasi va ularni davolash masalalari bo‘yicha normativ bazani takomillashtirish;
• surunkali virusli gepatitlar profilaktikasi, ularga tashxis qo‘yish va ularni davolash chora-tadbirlarini yanada takomillashtirish;
• Respublikada yuqumli kasalliklar muassasalarining moddiy-texnika bazasini yanada rivojlantirish va modernizatsiya qilish;
• sog‘liqni saqlash tizimining yuqumli kasalliklar muassasalarining kadrlar salohiyatini mustahkamlash.
Kompleks chora-tadbirlarni moliyalashtirishning umumiy hajmi 118,8 mlrd so‘m va 6,39 mln AQSh dollarini tashkil etadi.
Bundan tashqari, kelasi yili mamlakatda gepatologiya markazlari ochiladi. Ular Sog‘liqni saqlash vazirligi Virusologiya ITI, Epidemiologiya, mikrobiologiya va yuqumli kasalliklar ITI hamda hududiy yuqumli kasalliklar kasalxonalari tuzilmalarida tashkil etiladi.
Gepatologiya markazlarining vazifalari quyidagilardan iborat:
• dispanser ko‘rigidan va profilaktik tibbiy ko‘rikdan o‘tkazishda aholini ommaviy tekshirishni tashkil etish maqsadida yuqumli kasalliklar va virusli gepatitlarning laboratoriya diagnostikasi samaradorligi oshirilishini ta'minlaydi;
• epidemiologiya, virusologiya, mikrobiologiyasi, yuqumli kasalliklar profilaktikasi, ularga tashxis qo‘yish va ularni davolash masalalari bo‘yicha fundamental va ilmiy-amaliy tadqiqotlarning asosiy yo‘nalishlarini belgilashda, shuningdek tadqiqot natijalarini sog‘liqni saqlash amaliyotiga joriy etishda qatnashadi;
• yuqumli kasalliklar, shu jumladan virusli gepatitlar tarqalishining oldini olish bo‘yicha profilaktik, sanitariya-gigiyenik va epidemiyaga qarshi tadbirlarni ishlab chiqish va amalga oshirishda qatnashadi.
