Rossiyada «Erkin internet uchun» harakati o‘tkazilishi rejalashtirilmoqda 

Rossiya Federatsiyasidagi «Erkin internet uchun» harakati tashkiliy qo‘mitasi 26 avgust kuni o‘tkazilishi belgilangan yangi norozilik yurishini e'lon qildi. Bu safargi tadbir tashkilotchilari qatoriga «PARNAS» partiyasi, «Fuqarolik tashabbusi», «Demokratik saylov» hamda Qaroqchilik, Libertarian partiyalari, «RosKomSvoboda» va «Protestnaya Moskva» kabi notijorat tashkilotlar qo‘shilgan. 

Tashkiliy qo‘mita vakillaridan biri Emil Xalikovning aytishicha, ikkinchi marta o‘tkaziladigan «Erkin internet uchun» harakati poytaxt Moskvadan tashqari Rossiyaning boshqa shaharlarida ham o‘tkaziladi.

Shuningdek, mazkur tadbir Korrupsiyaga qarshi kurash fondi ko‘magida tashkil etilayotgan bo‘lib, uning final qismida Aleksey Navalniy saylovoldi shtabi rahbari Leonid Volkov nutq so‘zlashi rejalashtirilgan.