Norvegiyada dunyodagi eng katta ma'lumotlar markazi quriladi

Zamonaviy ma'lumotlar markazlari ko‘p energiya talab qiladi, juda ko‘p ma'lumotlarni saqlaydi, murakkab hisob-kitoblarni amalga oshiradi va albatta, tizimlarning barqaror ishlashini ta'minlash uchun juda kuchli muzlatish tizimini talab qiladi. Shu jihatdan olib qaraganda hisoblash mashinalarining sovuq o‘lkalarda o‘rnatilishi mantiqan to‘g‘ri. Norvegiyada dunyodagi eng katta ma'lumotlar markazini qurishni rejalashtirayotgan Kolos kompaniyasi ham aynan shunga asoslandi. Hi-News shu haqida xabar berdi. 

Norvegiyaning sovuq iqlimi juda samarali energiya tizimini yaratishga imkon beradi, mahalliy qayta tiklanuvchi energiya manbalari esa energiya bilan ta'minlash muammosini yechishga yordam beradi. Kolos kompaniyasi vakillarining ma'lum qilishicha, ma'lumotlar markazining faoliyati uchun zarur energiyaning barchasi shamol va yaqin orada joylashgan daryolardagi gidroelektrostansiyalar yordamida olinadi. Mutaxassislarning hisob-kitoblariga ko‘ra, inshootga bir oyda 1000 megavittga yaqin energiya kerak bo‘ladi, lekin mahalliy sovuq iqlim bu ko‘rsatkichni 60 foizga kamaytirish imkonini beradi. 

Kolos kompaniyasi dizaynerlari Norvegiyaning HDR firmasining arxitektorlari bilan hamkorlikda bo‘lg‘usi inshoot loyihasini ishlab chiqishdi. Yaqin vaqt ichida bino, infratuzilmaning barcha elementlari, yordamchi inshootlar loyihalari tasdiqlanadi va qurilish ishlari boshlanadi.