O‘zbekiston chegarachilari tranzit poyezdida geroin topdilar

O‘zbekiston chegara qo‘shinlari harbiy xizmatchilari Tojikistondan narkotik moddalar partiyasini temir yo‘l transport yordamida kontrabanda yo‘li bilan olib kirish harakatiga chek qo‘yishdi.
 
"22 avgust kuni “Boldir” chegara stansiyasida chegarachilar Davlat bojxona qo‘mitasining Surxondaryo viloyati bo‘yicha Boshqarmasi xodimlari bilan hamkorlikda 319-raqamli “Dushanbe-Moskva” poyezdini ko‘zdan kechirish chog‘ida, tashqi belgilari geroinga o‘xshash bo‘lgan kukunli 3 ta polietilen paketni aniqlashdi. Paketlar vagonlardan biri g‘ildirak juftligining topish qiyin bo‘lgan joyiga yashirib qo‘yilgan", - dedi Milliy xavfsizlik xizmati Davlat chegaralarini qo‘riqlash Qo‘mitasi vakili.

Tahlillarning ko‘rsatishicha, polietilen paketlardagi modda geroin bo‘lib, uning umumiy og‘irligi 188,95 grammga teng. Ushbu holat bo‘yicha jinoiy ish qo‘zg‘atildi.