Kiyev Yunker so‘zlaridan so‘ng Yevrokomissiyadan izoh so‘ramoqda

Ukrainaning YeIdagi vakili Nikolay Tochitskiy Yevropa Komissiyasiga murojat qilib, YeK rahbari Jan-Klod Yunker so‘zlari bo‘yicha izoh berishni so‘radi. Yunker Ukrainaning NATO va YeIga a'zo bo‘lishi haqida o‘z fikrlarini bildirgan edi, deb xabar qilmoqda UNIAN.

YeK raisi Ukraina ayni vaqtda YeIga ham NATOga ham aloqasi yo‘qligini aytgan edi. 

Tochitskiyning bayonot berishicha, u YeKdan Yunkerning elchilar bilan Bryusselda o‘tkazgan konferensiyasida aytgan so‘zlari yuzasidan izohlar so‘ragan. U, shuningdek, Ukrainaning Yevropa hamda Yevroatlantika tuzilmalari bilan integratsiyaga intilishi o‘zgarmasligi haqidagi prezident Pyotr Poroshenko so‘zlarini yodga olgan. 

Tochitskiyga ko‘ra, u Yevrokomissiyadagi hamkasblariga o‘z xavotirlarini bildirgan, chunki  Yunkerning so‘zlari OAV tomonidan «Ukraina va Yevrointegratsiya yo‘lini obro‘sizlantirish maqsadida qo‘llanilgan».