“Mahalla” fondi bu yilgi davlat dasturi uchun 9,6 mlrd so‘m mablag‘ sarfladi

“Xalq bilan muloqot va inson manfaatlari yili” Davlat dasturida belgilangan tadbirlarning ijrosini ta'minlash maqsadida “Mahalla” xayriya jamoat fondi tomonidan 9673,8 mln so‘m mablag‘ sarflandi. Bu haqda 30 avgust kuni Xalqaro press-klubning “Zamonaviy mahalla: tashabbuslar va kadriyatlar beshigi” mavzusiga bag‘ishlangan anjumanida ma'lum qilindi. 

Anjumanda ta'kidlanishicha, davlat dasturi doirasida kam ta'minlangan, ijtimoiy himoyaga muhtoj, urush va mehnat fronti faxriylari, yolg‘iz keksalar, nogironlarning 26 118 nafariga 3 456,4 mln so‘mlik moddiy yordam ko‘rsatildi. 125 nafar nogiron va chin yetim talabaning o‘quv-shartnoma pullarini to‘lash uchun 497,8 mln. so‘m ajratildi.

Joriy yilgi yozgi ta'til mavsumida mahallalardagi kam ta'minlangan va ijtimoiy himoyaga muhtoj 700 ta oilaning farzandlarini 72 ta so‘lim oromgohda dam oldi. Buning uchun “Mahalla” fondining hududiy bo‘lim va bo‘linmalari hisobidan 600,0 mln. so‘m mablag‘ sarflandi. 

Shuningdek, 698 nafar yolg‘iz keksalar, 812 nafar pensionerlarga oziq-ovqat mahsulotlari, 321 nafar nogironga maxsus aravachalar sovg‘a qilindi, 128 nafar yolg‘iz keksaning tug‘ilgan kunlari nishonlab berildi. 611 nafar keksaning uy-joylari ta'mirlandi. 8710 nafar keksa avlod vakillari, ijtimoiy himoyaga muhtoj oilalar farzandlari uchun tarixiy obidalar, ziyoratgohlar va muqaddas qadamjolarga sayohatlar uyushtirildi.

2017 yil iyun holatiga ko‘ra, 5,5 mln. dan ziyod xonadonlar bilan muloqotlar qilindi. Buning natijasida, 839 ming 900 ta muammo va takliflar aniqlandi. Ularning 421 ming 630 tasi (48,3 %) joyida hal etildi, 418 ming 270 tasi tuman va shahar dasturlariga kiritildi.

Fuqarolarning o‘zini o‘zi boshqarish organlarining moddiy-texnika bazasini yanada mustahkamlash bo‘yicha “Mahalla” fondi tomonidan 1 759 ta fuqarolar yig‘ini mebel jihozlari, 715tasi kompyuter jamlanmasi bilan ta'minlanadi. 149 ta fuqarolar yig‘ini joriy ta'mirlanadi. 88tasi rekonstruksiya qilinib, 72 tasi yangidan qurildi. 129 ta bolalar maydonchasi ta'mirlandi, 213ta zamonaviy va xavfsiz bolalar maydonchasi namunaviy loyiha asosida qurilib, foydalanishga topshirildi.

“Xalq bilan muloqot va inson mafaatlari yili” Davlat dasturida belgilangan tadbirlarning ijrosini ta'minlash maqsadida “Mahalla” xayriya jamoat fondi tomonidan 9673 ,8 mln so‘m mablag‘lari sarflandi.