Biz bilgan va bilmagan Suriya. Kimdan ortda qoldik?

Janubiy Koreya, Eron, Yaponiya yoki Avstraliya kabi terma jamoalardan yutqazishga, mundial yo‘llanmasini ularga boy berishga o‘rganib qolganmiz. Ammo bu safar biz uchun doim past maqomdagi raqib tuyulgan Suriyadan ham ortda qolib ketganimiz dardimizni yanada kuchaytirib yubordi. Xo‘sh, atigi bir yil oldin mensimaganimiz, avvaldan 6 ochko olishni rejalashtirganimiz Suriya qanday jamoa? Biz ularning darajasiga tushib qoldikmi yoki ular kuchayib ketdimi?

Ma'lumotlarni o‘qib siz ham shunga amin bo‘lishingiz mumkinki, ular bizni yutish uchun qandaydir katta bir ishni amalga oshirishgani yo‘q. Aksincha, biz hech narsa qilmaganimiz uchun shu darajaga tushib qoldik.  

SURIYa 2017 YILDA ATIGI BIR MARTA YuTQAZDI

Suriya terma jamoasi 2017 yilda atigi bir o‘yinda mag‘lubiyatga uchradi xolos. U ham bo‘lsa, Janubiy Koreya terma jamoasidan. O‘zbekiston va Qatar ustidan g‘alaba qozondi, Eron va Xitoyga qarshi o‘yinlar 2:2 hisobida yakunlandi. Suriyaliklar bu o‘yinlarda 8 marta raqib darvozasini ishg‘ol qilishdi. Mana shu 5 turda atigi 1 marta, u ham bo‘lsa, jarima zarbasidan keyin to‘p kiritgan O‘zbekiston bilan solishtirganda, ularning uchinchi o‘rin uchun haqliroq bo‘lganini ko‘ramiz.

SURIYa O‘Z MAYDONIDA O‘YNAMADI

O‘zbekiston qo‘lga kiritgan 13 ochkosidan 10tasini Toshkentdagi o‘yinlarda oldi. Janubiy Koreya esa, 15 ochkodan 13tasini o‘z maydonidagi o‘yinlarda qo‘lga kiritdi. Shu o‘rinda, “o‘z uyingda devorlar ham yordam beradi” degan mashhur iborani qo‘llash mumkin. Suriya terma jamoasi esa, o‘z o‘yinlarini faqat safarda va neytral maydonda o‘tkazdi. Shu holatda ham 13 ochko to‘plab, O‘zbekiston va Janubiy Koreya bilan raqobat qila olishgani tahsinga loyiq.

SURIYa NATIJA UChUN BARChANI BIRLAShTIRDI

Terma jamoa safida yaqqol yulduzlar yo‘q. Terma jamoaning aksariyat futbolchilari xorijda to‘p suradi. Jumladan, olti nafari Malayziyada, jamoa to‘purari Umar Xribin Saudiya Arabistoni chempionatida, Mahmud Al Maaz Qatar ligasida to‘p suradi. 

Yoki yana bir hujumchi - Umar As Soma, Saudiyaning “Al Ahli” jamoasi yetakchilaridan biri, uzoq vaqt Suriyaga qaytishni istamay, fuqaroligini almashtirish payida yurdi. Lekin u ham so‘nggi ikki o‘yinda terma jamoaga yordamga keldi. Bizni 4-o‘ringa tushirib yuborgan o‘sha so‘nggi daqiqadagi gol muallifi ham shu futbolchi.

Shuningdek, o‘z vaqtida Bashar Asadga qarshi ekani bilan nomi chiqqan va Asad tufayli terma jamoadagi o‘yinlarini to‘xtatgan futbolchilar bor. Masalan, Firas Al Hatib – Suriya futboli tarixidagi eng yaxshi futbolchilardan biri. 2012 yilda u muxolifatni qo‘llab-quvvatlaydi va Bashar Asadga qarshi chiqishlar qiladi. Mamlakatni tark etib, terma jamoada o‘ynashdan bosh tortdi.

Oradan 5 yil o‘tib, u yana Suriyaga qaytdi va jamoa Jahon Chempionatiga chiqishi yo‘lida bor yordam berishni boshladi.

SURIYaDA FUTBOLChILAR HAM O‘LDIRILADI

Suriyadagi futbol borasida o‘z izlanishlarini olib borgan ESPN ma'lumotlariga qaraganda, u yerda futbol o‘yini Bashar Asadning targ‘ibot quroliga aylanib qolgan. Sobiq suriyalik futbolchi Ayman Kashit 2015 yilda FIFAga “Suriya futbolchilariga qarshi harbiy jinoyatlar” nomi ostida hisobot tayyorlab bergandi.

“FIFA ning qoidalari va qarorlarida ziddiyatlar mavjud” – degandi u  ESPN ga bergan intervyusida, - “qoidalarga ko‘ra, agar hukumatlar futbol boshqaruviga aralashishsa, federatsiyalar jazolanishi kerak. Ayni damda, mamlakatda urush bo‘lmoqda, stadionlar harbiy omborlarga aylantirilgan, 18 dan yosh bo‘lgan bolalar va futbolchilar o‘lmoqda, ba'zi futbolchilar qamoqqa olingan, lekin qani FIFAning qarorlari? Bu – ikkiyuzlamachilik”

Suriyani tark etgan sport jurnalisti Anas Ammoning ma'lumotiga ko‘ra, so‘nggi yillarda kamida 38 nafar professional futbolchi o‘ldirilgan yoki yaralangan, yana 13 futbolchi bedarak yo‘qolgan.

SURIYa DARVOZABONI QAMALIB ChIQQAN

Suriya terma jamoasi darvozaboni Mus'ab Balxuz 2011 yilning avgustida qamoqqa olingandi. U bir nechta qochqin muxolifatchi yashirinib yurishiga yordam bergani uchun hibsga olingan. Shuningdek, uning uyidan shubhali darajada katta miqdordagi pul chiqqandi. Oradan bir necha oy o‘tib, Balxuz tergov jarayoni bilan hamkorlik qilishga rozi bo‘ladi va ozodlikka chiqadi.

Endi u kelasi yili jahon chempionatida ishtirok etishi ham mumkin.

SURIYaDAN QOLIB KeTIShIMIZ BIRINChI MARTA EMAS

Terma jamoamiz bundan 21 yil oldin, o‘zi uchun debyut bo‘lgan Osiyo kubogida Suriya bilan bir guruhda to‘p surgan edi. BAA da o‘tgan ushbu musobaqani Osiyoning eng kuchli jamoasi maqomida boshlagan yurtdoshlarimiz Xitoy ustidan g‘alaba qozondi. Keyin esa, Yaponiya terma jamoasiga 0:4 hisobida boy berildi.

So‘nggi turda biz Suriya bilan o‘ynadik va bu o‘yindagi durang natija bizni kamida 3-o‘rin bilan chorak finalga olib chiqardi. Lekin terma jamoamiz durangni saqlab qololmadi. 1:2 hisobidagi mag‘lubiyatdan so‘ng, terma jamoamiz guruhda so‘nggi o‘ringa tushib ketdi.

Bundan tashqari, biz avvalgi mundial saralashida ham Suriya bilan ro‘para kelishimiz mumkin bo‘lgandi. Suriya pley-offda Tojikistonni yengib, uchinchi bosqichdagi guruhimizdan joy olgandi. Ammo keyinchalik ma'lum bo‘lishicha, jamoa tarkibida o‘sha o‘yinlarda maydonga tushgan George Murod aslida Shvetsiya fuqarosi bo‘lib chiqqan. Natijada suriyaliklar diskvalifikatsiya qilinib, guruhimizdan qo‘shnilarimiz joy olgandi.

Q.Aslanov tayyorladi