Ukrainada NATOga kirish bo‘yicha referendum o‘tkazilishi mumkin

Ukraina prezidenti Pyotr Poroshenkoning ma'lum qilishicha, mamlakat NATOga kirish bo‘yicha Harakatlar rejasini hozirdan bajarmoqda. Shuningdek, u alyansga kirish bo‘yicha umumxalq referendumini o‘tkazish tashabbusi bilan chiqishini istisno etmadi. Bu haqda «Interfaks» xabar bermoqda.

«Biz a'zolik bo‘yicha Harakatlar rejasi formal tasdiqlanmagan bo‘lsa-da, biroq, uni bir tomonlama holatda bajarmoqdamiz», - dedi Poroshenko Oliy radadagi chiqishi vaqtida.

Uning ta'kidlashicha, jamoatchilik fikrini o‘rganish bo‘yicha o‘tkazilgan so‘rovlar ukrainaliklar mamlakatning NATOga kirishiga qarshi emasligini ko‘rsatmoqda.

«Men vaqti kelganida tegishli referendum tashabbusi bilan chiqishimni istisno etmayman, bu Ukraina xalqi xohishini ko‘rsatadi. Barchaga: ham bizning do‘stlarga, ham tajovuzkor qo‘shniga, ham ukrainalik barcha siyosatchilarga... Bu istalgan siyosiy vaziyatda hech birimizga bu kursni taftish qilish hamda ortga qaytishimizga imkon bermaydi», - deya ma'lum qildi Ukraina prezidenti.

Avvalroq Poroshenko Yevropa Ittifoqiga yo‘ldagi to‘siqlarni yengib o‘tishga va'da bergandi.