Farg‘onadagi O‘zbekiston-Xitoy qo‘shma korxonasining muvaffaqiyati nimada?

Farg‘onada joylashgan “NARIMTEKS” MChJ O‘zbekiston-Xitoy qo‘shma korxonasi mamlakatda yaratilgan qulay investitsion muhit, davlat rahbariyati tomonidan kichik biznes va tadbirkorlikni rivojlantirishni qo‘llab-quvvatlash borasida olib borayotgan samarali siyosatning natijasi va davlatlar o‘rtasida o‘rnatilgan o‘zaro iqtisodiy xamkorlikning mahsuli sifatida 2008 yilning iyun oyidan o‘z faoliyatini boshlagan. 

Qo‘shma korxona tashkil etilgan 2008 yilda jami 22 nafar ishchi va xodimlar ishlagan bo‘lsa, 2016 yilda ular soni 60 ga yetdi. Hozirgi kunda esa ushbu korxonada 70dan ziyod ishchi va xodim mehnat qilmoqda va ularning 52 nafari ayollar, 20 nafari kasb-hunar kollejlari bitiruvchilaridir.

Qo‘shma korxona  o‘z faoliyatini boshlagandan buyon o‘tgan davr ichida ishlab chiqarishni modernizatsiya qilish, yangi texnika va texnologiyalarni joriy qilish borasida asosan Germaniya, Italiya, Yaponiya va Xitoyda ishlab chiqarilgan zamonaviy tikuv, to‘quv jihozlari keltirib o‘rnatildi. Natijada ishlab chiqarish samaradorligi oshdi. 2010 yilda 441 mln. so‘mlik mahsulot ishlab chiqarilgan bo‘lsa, 2015 yilga kelib bu ko‘rsatkich 1 mld. 520 mln. so‘mni tashkil qildi. 300 dan ortiq ayollar qishki kiyimlari modellari ishlab chiqarishga joriy qilindi.

2016 yilda korxonada ishlab chiqarilgan mahsulot hajmi 4 mlrd. so‘mni tashkil qildi. Korxona mahsulotlari hozirgi kunda respublika ichki bozorlarida hamda MDH davlatlarida muvaffaqiyatli sotilmoqda. 2015 yilda korxonada ishlab chiqarilgan mahsulotlar eksport hajmi 314 000 AQSh dollari, 2016 yilda esa 880,0 ming AQSh dollarini tashkil etdi.

Korxona raxbariyati ishchilarning ish va maishiy sharoitlarini yaxshilash bo‘yicha ham bir qator ishlarni amalga oshirmoqda. Bugungi kunda ishchi va xodimlar uchun 150 o‘rinli yangi oshxona, dam olish, jismoniy tarbiya bilan shug‘ullanish xonalarini o‘zida mujassamlashtirgan binoning qurilishi jadal olib borilmoqda.

Korxonada hozirda ayollarning 8 turdagi, 700 modeldagi qishki va yozgi kiyim-kechaklari ishlab chiqarilmoqda va dizaynerlar milliy hamda an'anaviy bichimdagi hammabop va hamyonbop mahsulotlarni ishlab chiqarish ustida izlanish olib bormoqdalar.