Ukrainalik professor Samarqandda mahorat darslari o‘tib berdi

Sog‘liqni saqlash vazirligi taklifiga binoan yurtimizda bo‘lib turgan ukrainalik taniqli mutaxassis, tibbiyot fanlari doktori, professor Viktor Stepanenko Samarqand shahrida bo‘lib, teri-tanosil kasalliklari bo‘yicha mahorat darslari o‘tkazdi, deb yozadi viloyatning «Zarafshon» gazetasi.

Viloyat OITSga qarshi kurashish markazida tashkil etilgan tadbirda viloyat sog‘liqni saqlash boshqarmasi, shahar va tumanlar tibbiyot birlashmalarining teri-tanosil kasalliklari bo‘yicha mutaxassislari ishtirok etdi.

— Toshkent shahrida o‘tkazilgan VII xalqaro dermatovenerologlar s'yezdida ishtirok etdim, — deydi A.A.Bogomolts nomidagi Ukraina milliy tibbiyot universiteti dermatologiya va venerologiya kafedrasi mudiri, professor Viktor Stepanenko. — Jahonning turli davlatlaridan kelgan dermatolog va venerolog mutaxassislar ushbu kasallikning muammolari, uni bartaraf etish yo‘llarini izlashdi. Teri-tanosil kasalliklarini davolash borasida o‘zaro tajriba almashishdi. O‘zbekistonlik shifokorlar tajribasi kam emas. Ular olib borgan ilmiy ishlar bilan tanishib, boshqalarga o‘rnak bo‘ladigan jihatlardan xursand bo‘ldim.

Ukrainalik olim mutaxassislarimizning turli yuqumli kasalliklarni davolash, profilaktika qilish borasidagi savollariga javob berdi.