Vazirlar Mahkamasining 2017 yil 22 sentabrdagi 748-son Qarori bilan Hayvonlarni identifikatsiya qilish, ularni hisobga olish, hisobdan chiqarish va saqlash tartibi to‘g‘risidagi nizom tasdiqlandi.
 
Norma.uz’ning xabar berishicha, nizomga ko‘ra, hayvonlarni identifikatsiya qilish quyidagilarni o‘z ichiga oladi:

•  hayvonlarga turlariga qarab individual raqam berish (birkalash, tamg‘alash, jyetonlash, chip o‘rnatish);
•  elektron axborot tizimiga hayvonlar to‘g‘risida ma'lumot kiritish;
•  veterinariya pasportini rasmiylashtirish.
 
Hayvonlarning egalaridan identifikatsiya qilish xizmatlari uchun to‘lov undiriladi. To‘lov miqdori va shartlari Davlat veterinariya qo‘mitasi tomonidan belgilanadi.
 
Belgilanishicha, qoramol, qo‘y, echki, tuyalarning bolalari tug‘ilganidan 14 kundan keyin 1 oylikdan kechikmasdan, qulunlar va xo‘tiklar 4 oyligidan, cho‘chqa bolalari 1 oyligidan, it va mushuklar 3 oyligidan hisobga olinadi.
 
Xaridor hayvonni sotib olganda (oluvchi hayvonni hadyaga olganda) doimiy yashash joyi bo‘yicha davlat veterinariya xizmatining vakiliga 7 kun ichida hayvonni hisobga qo‘yish to‘g‘risidagi ariza bilan murojaat qiladi. Hayvon 3 kun ichida hisobga olinadi. Hayvon hisobga olinganidan so‘ng uning egasining shaxsini tasdiqlovchi hujjatga asosan veterinariya pasporti rasmiylashtiriladi. Har bir hayvonga alohida veterinariya pasporti rasmiylashtiriladi (qo‘y va echkilarga guruh usulida rasmiylashtirilishi mumkin). Hayvonning sobiq egasi esa davlat veterinariya xizmatining vakiliga hayvon sotilganligi yoki hadya qilinganligini veterinariya pasportida tasdiqlatishi shart.
 
Veterinariya pasporti yo‘qolganda yoki yaroqsiz holga kelib qolganda uning dublikati beriladi. Veterinariya pasporti yo‘qolganligi va yaroqsiz holga kelganligi to‘g‘risidagi ariza taqdim qilingan kundan boshlab 3 kun ichida hayvon egasiga “Dublikat” so‘zi yozilgan yangi veterinariya pasporti beriladi.
 
Hayvon egalari hayvon so‘yilganda (nobud bo‘lganda, yo‘q qilinganda) hayvonning identifikatsiya raqamini saqlovchi atribut (birka, jyeton, oyoq halqasi, elektron chip va boshqalar) va veterinariya pasportini 7 kun ichida davlat veterinariya xizmatining vakiliga hayvonni hisobdan chiqarish uchun taqdim qiladi. So‘yilgan hayvonlarga ixtisoslashgan so‘yish korxonasining veterinariya vrachi tomonidan hayvon egasiga berilgan “Hayvon so‘yilganligi to‘g‘risida” ma'lumotnoma ham taqdim etiladi.