Lyuis Hemilton "Formula-1" poygalarining 4 karra chempioniga aylandi

Britaniyalik poygachi, "Mersedes" jamoasi a'zosi Lyuis Hemilton Meksika Gran-prisi natijalariga ko‘ra faoliyatida 4-marta "Formula-1" poygasi chempioniga aylandi. Poygachi bundan juda xursandligini, biroq poyganing o‘zidan ko‘ngli to‘lmaganini aytib o‘tgan. 

Ushbu poyga Lyuis uchun uncha muvaffaqiyatli kechmadi. Poygachi o‘zining asosiy raqibi Sebastyan Fettel bilan kurashda poyganing birinchi davrasidayoq u bilan to‘qnashib, bolidi g‘ildiraklarini teshib oldi. Oqibatda u oxirgi o‘ringa tushib ketgan hamda butun poyga davomida oldinga chiqishga harakat qilgan. Natijada Hemilton marraga to‘qqizinchi bo‘lib keldi va poyga g‘olibi, gollandiyalik Maks Ferstappenga bir davradan ko‘proq vaqt yutqazgan. Biroq bu natija britaniyalik poygachiga muddatdan avval chempionlikni qo‘lga kiritishiga yetarlilik qildi.  

"Bu chempionlik unvonini qo‘lga kiritishning eng rasvo yo‘li bo‘lsa kerak, biroq nima ham qila olardik? 40 soniya ortda qolish – bu tanazzuldir. Biroq men qanday bo‘lmasin boy berilgan soniyalarni yutishga harakat qildim, shu sababli hozir aralash tuyg‘ularni his qilmoqdaman", deb aytgan chempion.

Chempionat yakunlanishiga ikki bosqich qolganda Hemilton raqiblari uchun yetib bo‘lmas darajada o‘zib ketdi. Uning hisobida 333 ochko, uning ortidan kelayotgan Fettelda esa 277 ochko bor. Britaniyalik poygachi chempionlik unvonlari soni bo‘yicha fransiyalik Alen Prost bilan tenglashdi. Bundan ko‘proq chempionlikni argentinalik Xuan Manuel Fanxio (5 marta) va afsonaviy Mixael Shumaxer (7 marta) qo‘lga kiritganlar.

Hemilton "Formula-1"dagi faoliyatini "Maklaren" jamoasida boshlagan. U jamoa uchun 6 mavsum o‘tkazgan va bir marta chempion bo‘lgan (2008 yil). 2013 yilda poygachi "Mersedes" jamoasiga o‘tgan va u bilan birga yana uch marta chempionlikka erisha olgan (2014, 2015, 2017 yillar). 

Hemiltonning hisobida hammasi bo‘lib "Formula-1"da 206 ta poyga bo‘lib, undan 62 tasida asosiy poygada g‘alaba qozongan va 72 tasida poul-pozishnni egallagan, bu esa "qirollik poygalari" uchun rekord natija hisoblanadi.