Turkiyada IShID tarafdorlari ushlandi

Turkiya politsiyasi yakshanba, 12 noyabr kuni Istanbulda IShID terrorchilik guruhi bilan aloqadorlikda gumonlangan 32 insonni hibsga oldi. Qo‘lga olinganlarning barchasi – xorijiy davlatlar fuqarolari, deb xabar bermoqda Anadolu agentligi. Shu bilan birga, ularning millati ochiqlanmagan.

Hibsga olishlar Istanbulning olti tumanida o‘tkazilgan politsiya reydlari davomida amalga oshirildi. Tintuvlar chog‘ida hujjatlar, shu jumladan raqamli qurilmalardan ham topildi.

Turkiya huquqni muhofaza qilish organlari so‘nggi haftalar ichida IShIDning mamlakat ichidagi ehtimoliy tarafdorlari bilan kurash choralarini kuchaytirishdi. Juma, 10 noyabrning o‘zida qator shaharlarda 109 kishi qo‘lga olindi, ular IShID bilan aloqadorlikda gumon qilinmoqda. Ushbu shaxslardan 82 nafari xorijlik ekani aytilmoqda.

Turkiya ichki ishlar vaziri Sulaymon So‘yluning ma'lum qilishicha, turk politsiyasi so‘nggi bir yil davomida IShIDning 4000 tarafdorini qo‘lga olgan. Ulardan 1129 nafari qamoqqa olindi.