KXDR tahdidi Kanadani sergak torttirdi

Kanada Milliy mudofaa vazirligi Ottava yaqinidagi ikkita yerosti bunkerlarini qayta ochish harakatlarini boshlab yubordi. CBC telekanali Kanada hukumatidagi manbaga asoslanib xabar berishicha, bunga Pxenyan tomonidan Shimoliy Amerikaga zarba berilishi xavfi paydo bo‘lgani sababdir.

Yerosti bunkerlari sovuq urush davrida qurilgan va poytaxt yaqinidagi harbiy baza hududida joylashgan. Telekanal xabariga ko‘ra, Jastin Tryudo ma'muriyatining maxfiy kengashi boshqarmasi 2016 yildayoq Mudofaa vazirligi bilan shunday ehtimol bo‘yicha maslahatlashuv o‘tkazgan va Vazirlar Mahkamasining favqulodda vaziyatlarda evakuatsiya qilinishi bo‘yicha barcha ehtimoliy rejalarni tekshiruvdan o‘tkazgan.

Chorshanba kuni Kanada Milliy mudofaa vaziri Xarjit Singh Sadjan jurnalistlarning KXDR tomonidan Kanadaga raketalar yo‘llashi ehtimoli bo‘yicha savoliga javob berar ekan, Ottava mamlakat uchun har qanday tahdid bilan hisoblashishini ma'lum qilgandi.