Rog‘un pullarini talon-toroj qilib yuborgan kompaniya egalari yana 2 oy qamoqda bo‘ladi

Dushanbe shahrining Firdavsiy tumani sudi Tojikistonga neft mahsulotlarini yetkazib berish hamda bu yerda sotish bilan shug‘ullangan «Umed-88» kompaniyasi rahbarlarining dastlabki hibs muddatini yana ikki oyga uzaytirdi. Kompaniya ta'sischisi Rajabali Odinayev va uning direktori Idibek Ibragimov joriy yilning oktabrida hibsga olingandi.

Rajabali Odinayev advokati Xisrav Ayubiyning 18 dekabr kuni xabar berishicha, u va Odinayev sud qaroriga qo‘shilishmaydi hamda bu borada shikoyat arizasi bilan chiqish niyatidalar. Advokatning so‘zlariga ko‘ra, tergovchilar kompaniyaning o‘zida tekshiruv ishlarini davom ettirishmoqda. Avvalroq kompaniya o‘z faoliyatini to‘xtatgani xabar berilgandi.

«Umed-88» MChJ rahbarlari Rajabali Odinayev va Idibek Ibragimovga nisbatan Tojikiston JKning ikkita moddasi bo‘yicha jinoyat ishi qo‘zg‘atilgan – kredit sifatida taqdim etilgan yirik mablag‘larni talon-toroj etish va xizmat vakolatlarining suiiste'mol qilinishi natijasida og‘ir oqibatlarga olib kelganlik.

Shu bilan birga, tergovga yaqin bo‘lgan manbaning xabar berishicha, jinoyat ishi bo‘yicha tergov o‘z yakuniga yetib qolgan hamda yanvarda barcha materiallar sudga topshiriladi. Kompaniya mol-mulki esa xatlov ostida qoladi. Avvalroq Rajabali Odinayevning yaqinlari rasmiylar kompaniya mulkini sotishga taqiq qo‘yishgani haqida xabar berishgandi.

Tojikiston rahbari Imomali Rahmon 14 oktabr kuni ishbilarmonlar bilan uchrashuvda mamlakat Moliya vazirligini «Umed-88» kompaniyasiga davlat byudjyetidan «turli tushunarsiz yo‘llar bilan» 170 milliondan ko‘proq somoniy taqdim etgani uchun jiddiy tanqid ostiga olgandi. Uning so‘zlariga ko‘ra, «Umed – 88» MChJ bu mablag‘larni ikki yildan beri davlatga qaytara olmayapti.

«Umed-88» kompaniyasi tadbirkor Rajabali Odinayev tomonidan 1996 yilda tashkil etilgan. Kompaniya Rossiya, Qozog‘iston va Turkmanistondan yoqilg‘i yetkazib berish bilan shug‘ullangan. Butun mamlakat bo‘ylab kompaniyaning 70 dan ortiq AYoQShi faoliyat ko‘rsatgan.

Eslatib o‘tamiz, avvalroq «Umed-88» kompaniyasi Rog‘un pullarini talon-toroj qilib yuborgani xabar berilgandi.