Surxondaryo viloyati hokimi bilan eksklyuziv suhbat: yillik hisobot va kelgusi rejalar

Kun.uz tahririyati 2017 yil Xalq bilan muloqot va inson manfaatlari yili munosabati bilan O‘zbekistonning turli viloyatlariga ijodiy safar uyushtirib, rahbarlar, mutasaddilar va aholi bilan muloqot o‘tkazishda davom etmoqda. Tahririyatning navbatdagi safari Surxondaryo viloyatiga bo‘ldi.

Safar davomida viloyat hokimi Erkinjon Turdimov bilan turli masalalarda ochiq suhbat bo‘lib o‘tdi. Ushbu suhbat davomida viloyatda mavjud muammolar tilga olindi va ularning hal etilishi borasida fikrlar o‘rtaga tashlandi. Istiqboldagi rejalar oydinlashdi.

«Surxondaryo viloyati hokimi sifatida faoliyat yuritayotganimga bir yil to‘lgan bo‘lsa, shu vaqt orasida 37 marta tumanlarga borib, xalq bilan ochiq muloqotlarni o‘tkazdim. Aholi bilan muloqot qilib, ularning murojaatlarining aksari o‘z joyida hal qilindi. Birdan hammasi bir yil ichida iziga tushmaydi, ammo o‘zgarishlar katta, aytish joizki, bu yil Surxondaryo uchun juda omadli keldi, desam adashmayman», deydi viloyat hokimi.

Erkinjon Turdimov ta'biri bilan aytganda, O‘zbekistonning eng tinch hududida majburiy mehnatning har qanday shakliga barham berilgan. «Ayrim quyidagi rahbarning o‘zboshimcha harakati bilan xizmat vazifasi davrida paxta terimiga jalb qilingan o‘qituvchi yoki shifokorni dalada ko‘rib qolsam, o‘sha rahbarni, albatta, jazoladim», deb fikr bildirdi u.

Erkinjon Turdimov tashabbusi bilan har bir tuman rahbari haftada belgilangan bir kunda aholi oldida o‘z hisobotini e'lon qilib boradi. Bu bilan xalqning mahalliy hokimiyat vakillariga ishonchi oshsa, ikkinchi tomondan, rahbarning har bir harakati shaffof va xolis ekani namoyon bo‘ladi. Qolaversa, suhbat chog‘ida ijtimoiy tarmoqlarda viloyat hokimi nomidan yuritilayotgan sahifalarni Erkinjon Turdimovning o‘zi shaxsan o‘qib, javob qaytarishini alohida ta'kidlab o‘tdi.

«Yil boshida to‘plangan ma'lumotga ko‘ra, viloyat aholisining 61 foizi toza ichimlik suvi bilan ta'minlanmagan. Shuning uchun, 50 mlrd. so‘mdan ziyod mablag‘ aholini ijtimoiy himoya qilish, toza ichimlik suvi bilan ta'minlashga yo‘naltirilmoqda. Aslida, viloyat hududida yerosti suv manbalari kam, shuning evaziga bu borada olib borilishi zarur bo‘lgan ishlar birmuncha murakkabdir», deya ta'kidlaydi u.

Erkinjon Turdimov Surxondaryo viloyatida uzluksiz elektr energiya ta'minoti, tabiiy gaz va toza ichimlik suvini aholiga muntazam yetkazib berish bo‘yicha taklif va rejalarini Kun.uz'ga ma'lum qildi. Suhbatning to‘liq shaklini quyidagi havola orqali tomosha qilishingiz mumkin.

YouTube