Samarqandda yirik narkoguruh a'zolari qamaldi

Samarqand shahar jinoiy ishlar bo‘yicha sudi Tojikistondan giyohvand moddalar kontrabandasiga ixtisoslashgan uyushgan jinoiy guruh (UJG) a'zolariga nisbatan jinoiy ishni ko‘rib chiqdi.

Guruhga Urgut tumanida yashovchi 6 nafar shaxs kirgan, ular qo‘shni davlatdan giyohvand moddalarni yetkazib berish uchun kanal tashkil qilgan.

"MXX tezkor xodimlari tuman hududida 33 yoshli Elbek To‘rayev rahbarligida uyushgan jinoiy guruh harakat qilayotgani haqida ma'lumot olishadi. E.To‘rayev va uning hamtovoqlari qo‘shni Tojikistonning chegaraoldi qishlog‘ida yashovchi Mardonboy ismli shaxs bilan aloqa o‘rnatishgan bo‘lib, undan ko‘knorning yirik partiyalarini xarid qilishib, so‘ng davlat chegarasining nazorat qilinishi murakkab bo‘lgan uchastkalari orqali O‘zbekistonga kontrabanda yo‘li bilan olib kirishgan", - deya aytib o‘tdi sud idorasi vakili.

O‘tkazilgan maxsus amaliyotlar natijasida UJG rahbari E.To‘rayev va uning hamtovoqlari E.Hamroyev, A.Xushvaqtov, O.Payziyev, A.Mo‘minov hamda L.Ibragimov qo‘lga olindi. Guruh a'zolarining uylari tintuv qilinganda, ko‘knorning yirik partiyalari, elektron tarozilar, giyohvand moddalarni olib o‘tishda ishlatilgan ikkita avtomashina, jinoiy yo‘l bilan olingan 50 million so‘mdan ortig‘ mablag‘, 2 ta ro‘yxatdan o‘tkazilmagan ov miltig‘i olib qo‘yildi.

Sud vakilining ma'lum qilishicha, E.To‘rayev va uning hamtovoqlari eshituvlar chog‘ida o‘z ayblarini to‘la tan olishdi hamda o‘zlarining jinoiy faoliyatlari, shuningdek giyohvand moddalarni Tojikistondan kontrabanda yo‘li bilan olib o‘tishning tashkillashtirilishi haqida gapirib berishdi. Ular shu yo‘l bilan 20 kilogrammdan ortiq ko‘knorni olib o‘tishga muvaffaq bo‘lishgan.

UJGning barcha a'zolari ko‘rib chiqilgan materiallar hamda ashyoviy dalillar asosida aybdor deb topildi va O‘zbekiston Jinoyat kodeksining qator moddalari bo‘yicha 12 yildan 15 yilgacha bo‘lgan muddatga ozodlikdan mahrum etildi.