Республикада Бош прокуратура Академиясини ташкил этиш режалаштириляпти. “Фаол тадбиркорлик, инновацион ғоялар ва технологияларни қўллаб-қувватлаш йили” давлат дастури лойиҳасида бу ҳақда маълум қилинган, деб ёзмоқда “Халқ сўзи” нашри.

Унга кўра, шу йил 1 майга қадар тегишли норматив-ҳуқуқий ҳужжат лойиҳаси ишлаб чиқилади. 

Мазкур ҳужжатда прокуратура органларининг ягона мажмуасини (ўқув бинолари, спорт-соғломлаштириш иншоотлари ва ҳ.к.) қуриш; прокурор-тергов ходимлари малакасини узлуксиз ошириш ва уларни қайта тайёрлашнинг самарали тизимини яратиш; ўқитишнинг инновацион шакл ва услубларини, энг янги педагогик ва ахборот-коммуникация технологиялари, масофадан ўқитиш ва мустақил таълим, интерфаол ва ситуацион машғулотлар, тренинглар ўтказишни кенг жорий этиш; қонунчиликни такомиллаштириш ва ягона ҳуқуқни қўллаш амалиётини шакллантириш бўйича илмий асосланган хулоса ва тавсияларни ишлаб чиқиш назарда тутилади.