Фарғонадаги қишлоқ аҳолиси сув дардида қишламоқда
15:40 / 10.01.2018
16233

Фарғона вилоятининг Ўзбекистон ва Бешариқ туманлари чегарадош ҳудудда жойлашган Бекобод қишлоғи (Ўзбекистон туманига қарашли) аҳолиси ичимлик суви муаммоси билан яшаб келмоқда. «Kun.uz»га мурожаат қилган қишлоқ аҳолиси вазиятни атрофлича баён этган. 

«Чекка қишлоққа сувнинг ҳам чеккаси етиб келган. Йўқ, олдин бундай эмас эди. Бекобод қишлоғи илгари сувдан қийналмаган. 60-йилларда 200 метр чуқурликдан очилган қудуқ чучук сувни каттагина қишлоққа қувур ва қирққа яқин водопровод крани воситасида етказиб берган. Бундан 10 йилча олдин шу сув чиқмай қолди. Мутахассисларнинг айтишича, ер остидаги сув захираси тугади», дейилади мурожаат хатида.

Шундан кейин ишлоқда яшовчи юзлаб хонадон, шунингдек, шу ҳудуддаги Катта Тагоб ва Кичик Тагоб қишлоқларининг бир қисми қуйидаги суратларда келтирилган икки жўмракдан сув ташиб ичишга маҳкум бўлиб қолган.

Фото: Kun.uz
Фото: Kun.uz
Фото: Kun.uz
Фото: Kun.uz

Бу жўмраклар олдида доимий навбатлар ҳосил бўлади, аҳоли машина, эшак арава, ва велосипед орқали челак, 5-10 литр сиғимли елим идишлар, пластмасса ва темир флягаларда сув ташийди.

Фото: Kun.uz
Фото: Kun.uz
Фото: Kun.uz
Фото: Kun.uz

«Кечаси бу артизонимиз олди сайилгоҳ бўлиб кетади, чунки ҳамма шу ерда. Жўмракларнинг олдига қабристоннинг ёнидаги зовур ёқалаб келишади. Йўл торроқ. Бир марта қизиқ бўлган, сув олиб кетаётган «Нексия»нинг капоти пастак эмасми, устига рўпарадан келаётган эшак чиқиб кетган. Капоти тешилган, «лобовой» синган», дея ҳикоя қилади Бекобод қишлоғидан бўлган Отабек.

Фото: Kun.uz

Бекободликлар 2007 йилдан бери туман ҳокимиятидан бу муаммони ечишда ёрдам сўраб келади. Вилоят «Сувоқава» Давлат унитар корхонаси бундан жуда яхши хабардор. Туман депутатларининг эшигига бир неча бор бош урилган. Уч ой бурун Сенат вакили ҳам қишлоққа қадамранжида қилиб аҳвол билан танишган, дастурга киритиш ваъдасини берган. Бироқ ўзгариш бўлмаяпти.

Фото: Kun.uz

Маълум бўлишича, муаммо ечими унчалик қийин эмас. 

«Бекободнинг остидаги сув қатламининг бирида захира тугаган бўлса, иккинчисида бор. Бекободнинг ёнидаги Қўрғонча қишлоғида 350 метр чуқурликдан чучук сув қудуғи қазиб чиқарилди. Бекободда ҳам 350 метрли янги қудуқ қазилса сув чиқади. Аммо бу иш учун озмунча югур-югуру, сарф-харажат кетмайди. Сув минораси, 1 километрга яқин қувурлар ва қудуқнинг ўзини қазиш хомчўтларга кўра 400 млн сўмдан ортади», дейди маҳаллий аҳоли вакили.

«Бекободни обод қилишга бел боғлаган беклар, сув келтиришга енг шимарган фарҳодлар борми? Ўйлаймизки, фарғоналик мутасаддилар оби ҳаёт дардида қиш чиқараётган қишлоқ аҳолисига бефарқ қараб ўтирмайди. Ахир, «Халқ билан мулоқот ва инсон манфаатлари йили» тугаса-да, инсон манфаатлари тугамайди-ку?», дея якунланган мурожаат.


Улашинг
Top