Yangi o‘quv yilida qabul imtihoni qayerda va qanday bo‘ladi? 

O‘zbekiston Respublikasi Prezidentining 2017 yil 16 noyabrda «Respublika oliy ta'lim muassasalari bakalavriatiga kirish test sinovlarini o‘tkazish tartibini takomillashtirish to‘g‘risida»gi qarori qabul qilingani haqida xabar berilgandi. Davlat test markazi Axborot xizmatining xabar berishicha, sohada bir qator o‘zgarishlar yuz bermoqda.

Ma'lum qilinishicha, mazkur qaror asosida OTMda 2018/2019 yilgi o‘quv mavsumida o‘tkazilishi belgilangan qabul imtihonlari quyidagi tartibda amalga oshiriladi:

1. Test sinovlari 1 avgustdan 15 avgustga qadar o‘tkaziladi.

2. Kirish test sinovlari natijalari test sinovi o‘tkazilgan kunning ertasiga Davlat test markazining rasmiy veb saytida e'lon qilinadi.

3. Test sinovlari Toshkent shahrida «O‘zekspomarkaz» Milliy ko‘rgazmalar majmuasi pavilonlarida, unga yondosh qo‘shimcha yig‘ma pavilonlarda, katta sig‘imdagi binolarda, viloyatlarda Olimpiya zaxiralari kollejlari yoki boshqa tashkilotlarga tegishli sig‘imi katta binolarda o‘tkaziladi.

4. Alohida iqtidor talab etiladigan madaniyat, san'at, dizayn, tasviriy va amaliy san'at, musiqiy ta'lim, san'atshunoslik, sport va jismoniy tarbiya sohasidagi ta'lim yo‘nalishlarida test sinovlari bo‘lmaydi.

5. Test sinovi o‘tkaziladigan binolarga abituriyentlarni shaxsni identifikatsiyalash vositalari, videofiksatsiya qurilmalari, metallodetektorlar orqali kiritilishi, jarayonni yoritish uchun monitorlar o‘rnatilishi belgilandi. Abituriyentlarning ota-onalari uchun test sinovlarini videokuzatuv orqali onlayn rejimda kuzatib borish imkoniyatlari yaratiladi.

6. Davlat test markazi xodimlarining soni keskin ko‘paytirilgan tuzilmasi qabul qilinmoqda.

7. Davlat test markazi faoliyatini rivojlantirish jamg‘armasi tashkil etilmoqda.