Tramp Rossiyani Shimoliy Koreyaga yordam berishda aybladi

Rossiya Shimoliy Koreya masalasini hal qilishda umuman yordam bermayapti, deb aytdi AQSh prezidenti Donald Tramp Reuters axborot agentligiga bergan intervyusida. 

Uning aytishicha, Moskva Pxenyanga BMT sanksiyalaridan qochishda ko‘mak bermoqda.

“Rossiya bizga Shimoliy Koreya masalasida umuman yordam bermayapti. Rossiya bu ishi bilan Xitoy berayotgan yordamni yo‘qqa chiqarmoqda”, deb aytgan Tramp.

Trampning ta'kidlashicha, buning barchasi Pxenyanni AQSh hududigacha yeta oladigan uzoq masofaga mo‘ljallangan raketani yaratishga borgan sari yaqinlashtirmoqda. 

Tramp, shuningdek, o‘zidan avvalgi prezidentlar Bill Klinton, Kichik Jorj Bush va Barak Obamani Shimoliy Koreya masalasini hal qila olmaganlikda aybladi.

Tramp Rossiya prezidenti Vladimir Putin Shimoliy Koreya muammosini hal qilish uchun ko‘p narsa qila olishini, biroq AQSh va Rossiya o‘rtasidagi aloqalarning yaxshimasligi bu masalada jiddiy yutuqlarga erishishga imkon bermayotganini ta'kidlab o‘tgan.  

Tramp shu bilan birga Xitoy bu masalada hissa qo‘shayotganini, biroq Pekin Pxenyanni bosib turish uchun bundan ham ko‘prog‘iga qodirligini aytgan.

Avvalroq Rossiya va Xitoy Koreya yarimorolidagi vaziyatni barqarorlashtirish uchun Shimoliy Koreyaga yadroviy sinovlar o‘tkazish va raketalar uchirishni to‘xtatishni, Janubiy Koreya va AQShga mintaqada mashg‘ulotlar o‘tkazishdan tiyilishni taklif qilgan. Biroq Vashington bunga rozi bo‘lmagan.