Samarqand va Valensiya shaharlari birodarlashadi

Valenciya muxtor provinsiyasi Ispaniyaning eng ko‘hna mintaqalaridan biri hisoblanadi. Sayyohlik jabhasi Valenciya iqtisodiyotida eng muhim o‘rinni egallaydi. Bu soha mintaqa iqtisodiyoti tizimining salkam 15 foizini tashkil qiladi. Muxtor provinsiyaning 15 foizdan ziyod mehnatga layoqatli aholisi ushbu jabhada faoliyat ko‘rsatadi. Keyingi yillar davomida sayyohlik mazkur mintaqa iqtisodiy rivojlanishining harakatlantiruvchi kuchiga aylandi.

«Jahon» AA xabariga ko‘ra, Samarqand shahri hokimi Furqat Rahimov Ispaniyaga safari chog‘ida sayyohlik sohasini hamda iqtisodiyotning boshqa tarmoqlarini rivojlantirish yuzasidan Valensiya orttirgan tajribani o‘rganish maqsadida mazkur provinsiyada bo‘ldi.

Mintaqaga safar doirasida Valenciya avtonom hamjamiyati hukumatining raisi Xayme Puij, uning sayyohlik bo‘yicha o‘rinbosari Frantsisk Kolomer, Ispaniya Kongressi deputati, YuNeSKOning «Ipak yo‘li» dasturi muvofiqlashtiruvchisi Xose-Maria Chikiyo, ushbu mintaqaning Sayyohlik agentliklari federatsiyasi prezidenti Salvador Amoros hamda sayyohlik firmalari, gastronomiya biznesi va to‘qimachilikka ixtisoslashgan kompaniyalarning vakillari bilan uchrashuv hamda muzokaralar o‘tkazildi.

Muzokaralar yakunlari o‘laroq, 2018 yilning birinchi yarmida Valensiya va Samarqand o‘rtasida birodarlashgan shaharlar aloqalarini o‘rnatish bo‘yicha Bayonnoma imzolash yuzasidan dastlabki kelishuvga erishilgani barobarida «Valensiyada Samarqand kunlari» deb nomlangan yirik madaniy-sayyohlik tadbirini o‘tkazishga ham kelishib olindi.