Tashkilot rasmiy sayti tomonidan e'lon qilingan fevral oyi uchun reytingda Shohjahon Ergashev juda katta o‘sishga erishgan va bir yo‘la 12-pog‘onadan o‘rin olgan.
Eslatib o‘tamiz, Shohjahon bunday yuqorilashiga uning yanvar oyidagi reytingda 8-o‘rinda borayotgan Sonni Fredriksson ustidan qozonilgan g‘alabasi sabab bo‘ldi. Oldinroq sportchining o‘zi taxminan 5-8 o‘rinlarga ko‘tarilishini kutayotgani haqida gapirib o‘tgandi.
WBA barcha vazn toifalarida faqat kuchli 15talik sportchilar reytingini e'lon qilib boradi va endilikda ushbu yo‘nalishda TOP-15likka kirgan o‘zbekistonlik bokschilar soni ikki nafarga yetgan. Bungacha yarim o‘rta (66,68 kg.gacha) vazn toifasida ringga ko‘tarilayotgan yo‘nalishning kumush kamari egasi bo‘lgan Qudratillo Abduqahhorovgina bu reytingda bor edi. Yanvarda reytingda 5-o‘rinda bo‘lgan Abduqahhorov bu safar bir o‘rin pastlab 6-o‘ringa tushgan. Biroq u hamon chempionlikka da'vogarlik jangini o‘tkazish huquqiga ega bo‘lib turibdi. Oldinroq, Abduqahhorov filippinlik Menni Pakyao bilan (reytingda 2-o‘ringa ko‘tarildi) ringga chiqishi mumkinligi aytilgandi.
Ergashevdan farqli ravishda Abduqahhorov WBC reytingida 5-pog‘onada, IBF yo‘nalishi reytingida esa 8-o‘rinda bormoqda va da'vogarlik jangida ishtirok etish huquqiga ega bo‘lib turibdi. Ergashev esa WBC e'lon qilgan TOP-50lik, IBF e'lon qilgan TOP-15lik reytinglarda qayd etilmagan.
