Rossiya o‘z tarixida birinchi marta hokkeyda olimpiada chempioni bo‘ldi

Janubiy Koreyaning Pyongchang shahrida davom etayotgan Qishki olimpiada o‘yinlarining hokkey musobaqasi nihoyasiga yetdi.

Finalda Rossiyalik olimpiyachi atletlar jamoasi Germaniya terma jamoasiga qarshi bahs olib bordi. Dramatik ruhda kechgan finalda ruslar avvaliga ikki marta hisobda oldinga chiqib olgan bo‘lsa, uchinchi davra so‘ngida 2:3 hisobida ortda borishayotgandi. Shundoq ham bir kishi kam bo‘lib o‘ynayotgan jamoa o‘yin tugashiga 55 soniya vaqt qolganida hisobni tenglashtirdi.

Overtaymda esa Rossiya to‘liq ustunlikni qo‘lga oldi «4+4» ko‘rinishida davom ettirilgan o‘yinda nemislar vakili klyushkasi bilan rossiyalik hokkeychining yuziga zarba berib yuborgani uchun ikki daqiqaga chetlatildi. Uch kishi qolgan Germaniya esa himoyada uzoq vaqt dosh bera olmadi. Kaprizov tomonidan kiritilgan oltin shayba jamoaga g‘alaba keltirdi.

Natijada Rossiya termasi o‘z tarixida birinchi marta Qishki olimpiadalarda oltin medalni qo‘lga kiritdi. So‘nggi marta Albervilda 1992 yilda MDH davlatlaridan iborat terma jamoa oltin medalni qo‘lga kiritgandi. 1998 yili Naganodagi o‘yinlarda rossiyaliklar kumush medallar bilan taqdirlangan, 2002 yili Solt-Leyk-Sitida o‘tkazilgan qishki olimpiadada ruslar belaruslarni uchinchi o‘rin uchun kechgan bahsda 7:2 hisobida yenggan.