7-iyul kuni Milliy olimpiya qo‘mitasida O‘zbekistonda hokkey sportini rivojlantirish masalasida uchrashuv bo‘lib o‘tdi.
Unda O‘zbekiston prezidentining sport bo‘yicha vakili Odil Abdurahmonov, sport vaziri Adham Ikromov, MOQ bosh kotibi Oybek Qosimov hamda mamlakat hokkey federatsiyasi vitse-prezidenti Bahodir Gafurov ishtirok etdi.
“Uchrashuvda yurtimizda yoshlarning xokkey bilan shug‘ullanishlari uchun yanada qulay sharoitlar yaratish, infratuzilmani kuchaytirish, yoshlar va kattalar terma jamoalarimizning jahon chempionatining yuqori divizionlariga ko‘tarilishlari uchun kerakli sharoitlarni yaratish, qishki Osiyo o‘yinlarida ishtirok etishlarini ta’minlash kabi mavzular atroflicha ko‘rib chiqildi.
Shuningdek, klublar faoliyatini kuchaytirish, seleksiya, malakali trener va murabbiylarni tayyorlashdek yo‘nalishlar ham muhokama qilindi”, – deyiladi qo‘mita xabarida.
Joriy yil aprel oyida tadbirkor Baxtiyor Fozilovning “Humo” hokkey klubi mamlakat ichkarisidan va Rossiyadan bosh homiy izlayotgani haqida xabarlar tarqalgan edi.
Bir necha kun oldin O‘zbekistonda hokkey ishqibozlari prezident Shavkat Mirziyoyevga murojaat bilan chiqib, mahalliy hokkeyni saqlab qolishni so‘ragan edi. Murojaatda “Humo” klubi yopilib ketish tahdidi ostida qolgani aytib o‘tilgan.
