Moskvada 27 fevral kuni Moskva davlat xalqaro munosabatlar instituti rektori Anatoliy Torkunov O‘zbekiston Respublikasi prezidenti huzuridagi Xavfsizlik kengashi apparati sektor mudiri Elyor G‘aniyev va O‘zbekistonning Rossiyadagi elchisi Bahrom Ashrafxonov bilan uchrashdi.
Uchrashuvda dolzarb xalqaro masalalar yuzasidan fikr almashildi. Tomonlar Rossiya-O‘zbekiston munosabatlarining yuqori darajasi va uni, xususan ta'lim sohasida yanada mustahkamlash zarurligini qayd etishdi, deya xabar berilgan Rossiya universiteti saytida.
Elyor G‘aniyev O‘zbekistonda kadrlar tayyorlashda MDXMI rolini ijobiy baholadi, hamkorlikning ko‘p yillik tajribasini rivojlantirish va yangi yo‘nalishlar bo‘yicha ishlarni boshlash taklifi bilan chiqdi. Toshkentda MDXMI filialining ochilishi bunday yo‘nalishlaridan biri bo‘lishi mumkin.
Rektor, o‘z navbatida, O‘zbekistondan kelgan abituriyentlarning tayyorgarlik darajasi yil sayin o‘sib borayotganligini qayd etdi. 20-25 aprel kunlari MDXMI Toshkent, Samarqand va Buxoroda bo‘lib o‘tadigan ta'lim ko‘rgazmasida yana ishtirok etadi.
Tomonlar qo‘shma ta'lim dasturlari va hamkorlikning boshqa shakllarini yaratish bilan bog‘liq masalalarni tezkorlik bilan boshlashga kelishib oldilar.
