Tramp AQSh prezidenti lavozimi umrbod berilishi g‘oyasini bildirdi

AQSh prezidenti Donald Tramp Xitoy hukumatining davlat rahbari lavozimida ikki muddatga qolish cheklovini bekor qilish tashabbusini “ajoyib” deb atadi. Bu haqda CNN telekanali xabar bermoqda.  

Trampga Xitoy raisi Si Tszinpinning bu boradagi g‘oyasi ma'qul kelgan. “Endi u (Si Tszinpin) umrining oxirigacha rais bo‘lib qoladi. Butun umrga rais. U ajoyib. Qarang, u buni qila oldi. Fikrimcha, bu ajoyib g‘oyadir. Balki, biz ham buni qachondir qilib ko‘rarmiz”, deb aytgan Tramp Floridadagi tadbirda.

26 fevralda Xitoy kompartiyasi markaziy qo‘mitasi mamlakat konstituttsiyasiga ba'zi o‘zgartirishlarni kiritish taklifini ko‘rib chiqdi. Butunxitoy xalq vakillari yig‘inining mart oyida o‘tadigan sessiyasida bir kishiga Xitoy raisi lavozimini 2 muddatdan ko‘proq egallash imkoniyatini beruvchi tuzatmalar qabul qilinishi taxmin qilinmoqda. Bu amaldagi rais Si Tszinpinga 2023 yil, ya'ni ikkinchi muddati yakunlangandan keyin ham o‘z lavozimida qolish imkonini beradi.