«PSJ» hujumchisi Neymar Parij klubidagi holatidan norozi bo‘lmoqda. Bu haqda El Mundo Deportivo nashri xabar tarqatdi.
Manba bergan xabarga ko‘ra, braziliyalik futbolchi «Barselona» klubi rahbarlariga Kataloniya klubiga qaytish istagida ekanini ma'lum qilgan. Neymar «PSJ»ga o‘tganidan afsusda va buni «Barsa» rahbarlariga tushuntirishga uringan.
Qayd qilinishicha, u Liga 1 musobaqalarining saviyasi La-ligaga nisbatan pastligini bilib turgan bo‘lsada, «PSJ» taklif qilgan moliyaviy shartlar sabab ketishga qaror qilgan. Endilikda futbolchi Messining soyasida qolib ketmaslik maqsadida qilgan qaroridan afsuslanmoqda.
Neymar qaytish niyatini ochiqchasiga ma'lum qilgan va buning uchun nima qilish lozimligini ham aniqlab olgan. Transfer 2018 yilda amalga oshmasligi aniq. Agar futbolchi haqiqatan ham jamoaga qaytishni istasa bu transfer 2019 yilda amalga oshishi mumkin.
Shu bilan birga «Barselona» rahbariyati bu savdoning amalga oshirish to‘g‘ri yoki noto‘g‘riligi masalasini hozircha muhokama qilgani yo‘q.
