O‘zbekiston MAGATE bilan hamkorlikni kengaytirmoqda

“O‘zstandart” agentligida Xalqaro atom energetikasi agentligi (MAGATE) tashabbusi bilan MAGATEning texnik hamkorlik dasturlari bo‘yicha menejyeri Kristof Samba Xenrix va MAGATE yadroviy yoqilg‘i sikli va chiqindilar texnologiyasi bo‘yicha ekspert Umar Salixbayev bilan uchrashuv bo‘lib o‘tdi, deb xabar qilmoqda agentlik axborot xizmati.

Ushbu uchrashuvda “O‘zstandart” agentligi tomonidan o‘zaro hamkorlikni kengaytirish, shu jumladan 2018-2019 yillarga mo‘ljallangan texnik hamkorlik loyihasi MAGATE UZB6015 «O‘zbekiston Respublikasida dozimetrli ikkilamchi etalonli laboratoriyani tashkil etish» (Establishing the Secondary Standards Dosimetry Laboratory) doirasida qiziqish bildirildi.

Ushbu loyiha doirasida O‘zbekiston milliy metrologiya instituti dozimetrik laboratoriyasini rentgen va gamma nurlanishli etalonlar bilan jihozlantirish, shu bilan birga mutaxassislar malakasini oshirish, o‘qitish (amaliyot o‘tash) va xalqaro davlatlar yetakchi metrologiya tashkilotlarining ilmiy seminarlarida qatnashish ko‘zda tutilgan. Loyihani amalda qo‘llash natijasida foydali qazilmalar ishlab chiqarish, mehnat xavfsizligi va sog‘liqni saqlash sohasida qo‘llaniladigan ionlovchi nurlanishli o‘lchash vositalarining yangi qiyoslash va kalibrlash usullari tadqiq etiladi.

Kristof Samba Xenrix turli yo‘nalishlarda Xalqaro atom energetikasi agentligi va “O‘zstandart” agentligi o‘rtasida o‘zaro hamkorlikni kengaytirish bo‘yicha tayyorligini bildirdi.

Uchrashuv davomida barcha yo‘nalishlarda fikr almashildi va kerakli shartnoma hamda bitimlarni qayta shakllantirib imzolash bo‘yicha qaror qabul qilindi.