Rossiya bilan «yumshoq munosabatlar» davri tugadi

Markaziy razvedka boshqarmasi sobiq direktori, AQShning yangi davlat kotibi Mayk Pompeo Rossiya bilan yumshoq munosabatlar olib borish siyosati o‘tmishda qolgani haqida ma'lum qildi.

«Rossiya agressiv harakatlanishda davom etmoqda. Ko‘p yillar davomida olib borilgan yumshoq siyosat ularning agressiyasiga qarshi nima qila oldi? Endi bunday davom etmaydi», degan Pompeo Kongressga yo‘llagan xatida.

U Rossiya bilan munosabatlarda qo‘llanadigan sanksiyalarni keltirgan: diplomatlarni chiqarib yuborish, Amerika armiyasini kuchaytirish, yadroviy rivojlanish, shuningdek, «Ukraina va Gruziya hududida Rossiya ekspansiyasiga qarshi qarshilik ko‘rsata oladigan kishilarni qurollantirish» shular jumlasida.

«Bu ro‘yxat birmuncha uzun. Bu ro‘yxatga yana qo‘shimchalar qilishim ehtimoli yuqori», degan Pompeo.

«Bizning ma'muriyatimiz prezidentning milliy xavfsizlik strategiyasida Rossiyani mamlakatimizga tahdid sifatida atashini aniq tushunib olishi kerak. Bizning Rossiya bilan diplomatik aloqalarimiz murakkablashib boradi», deya qo‘shimcha qilgan u. 

Munosabatlarning chigallashuvi, sanksiyalar va diplomatlarning chiqarib yuborilishi

Rossiya va AQSh o‘rtasida navbatdagi eskalatsiya Sharqiy G‘uta hududidagi Duma shahrida Suriya armiyasi tomonidan kimyoviy gaz qo‘llangani haqidagi xabarlardan keyin yuzaga keldi. G‘arb davlatlari rasmiy Damashqni ayblamoqda, ular suriyalik harbiylar xlorli bomba bilan tinch aholini zaharlashganini iddao etishmoqda. Rossiya esa bunday bo‘lmaganini ta'kidlamoqda.

Chorshanba kuni AQSh prezidenti Donald Tramp tvitterida Rossiyaga Suriyaga yo‘llanadigan raketalarni kutib olishga tayyorlanishni maslahat berdi. Biroz vaqt o‘tib u Vashington va Moskva munosabatlari sovuq urush davridagidan ham ko‘ra yomonroq ahvolga kelganini aytib o‘tdi.

O‘tgan hafta oxirida AQSh rossiyalik 38 tadbirkor va 15ta kompaniyani sanksiyalar ro‘yxatiga kiritdi. Sanktsiyalar ro‘yxati aktivlarni muzlatib qo‘yish, AQSh hududidagi jismoniy va yuridik shaxslarning ko‘chmas mulki hamda ehtimoliy bank hisob raqamlarini xatlovga olish, shuningdek, mamlakatga kirishni taqiqlashni nazarda tutadi.

Sanktsiyalardan eng ko‘proq Oleg Deripaska zarar ko‘rgan. En+, US Rusal va Deripaska bilan bog‘liq yana 6 kompaniya sanksiyalar ta'siriga tushgan. Rusal’ning Hongkong birjasidagi kotirovkalari 50 foizga tushib ketgan, Deripaskaning davlati esa 1,3 mlrd dollarga kamaygan. 

Mart oyi oxirida «Skripal ishi» doirasida Buyuk Britaniya hukumati bilan birdamlik sifatida AQSh 60 nafar rossiyalik diplomatni chiqarib yuborish qarorini qabul qildi. Shuningdek, Rossiyaning Sietl shahridagi bosh konsulxonasi yopildi.

Xalqaro mojarolar 4 mart kuni boshlangandi. O‘shanda Angliya janubidagi Solsberi shahrida Buyuk Britaniya foydasiga ishlagan rossiyalik sobiq josus Sergey Skripal va uning qizi Yuliy Skripal hushsiz holda topildi. London ular Rossiyada ishlab chiqarilgan asab tizimini falajlovchi «Novichok» moddasi bilan zaharlanganini, bu suiqasd ortida Rossiya turganini ma'lum qildi va Rossiyadan izoh berishni talab qildi. Rossiya tomoni bu so‘rovni e'tiborsiz qoldirganidan keyin Buyuk Britaniya Rossiyani o‘z hududida kimyoviy qurol qo‘llaganlikda ayblab, 23 nafar rossiyalik diplomatni o‘z hududidan chiqarib yubordi.